Vísir greindi frá því í morgun að mikil veikindi væru meðal starfsmanna í kjölfar bólusetningar á leikskólanum Mánagarði í Reykjavík. Þegar blaðamaður ræddi við leikskólastjóra í morgun voru sautján af tuttugu starfsmönnum sem fóru í bólusetningu veikir. Haraldur Freyr Gíslason, formaður Félags leikskólakennara, segir eitthvað um það að kennsla hafi verið skert í dag.

„Það er eitthvað um það að börn geti ekki mætt í leikskólana og kennslan er skert. Leikskólinn er viðkvæmur fyrir mönnun og við biðlum til foreldra að taka því vel, en þetta gengur vonandi hratt yfir, bæði bólusetningin og bati þeirra sem fá eftirköst og ég sendi þeim öllum mínar batakveðjur,“ sagði Haraldur í samtali við Reykjavík síðdegis í dag.

Hann segist vona að foreldrar sýni stöðunni skilning. „Ég trúi ekki öðru. Við erum að standa í þessu saman og nú er verið að ráðast í að bólusetja þessa framlínustétt, sem er vel og þá eru bara bjartari tímar fram undan.“

„Góð hugmynd að hafa þetta á miðvikudegi“

Bólusetningar hafa gengið hratt fyrir sig undanfarna daga og hafa margir fagnað sínu boði með færslum á samskiptamiðlum og myndum frá Laugardalshöll. Í dag hafa þó nokkrir greint frá aukaverkunum í kjölfar bólusetningar á Twitter og eru dæmi um að deildum leikskóla hafi verið lokað.

Óskar Steinn Jónínuson Ómarsson er einn þeirra sem fékk bólusetningu í gær, en hann hefur ákveðið að kalla aukaverkanirnar „covid light“.

Flestir lýsa hefðbundnum flensueinkennum; hita, hausverk, slappleika og beinverkjum. Margir hafa deilt reynslu sinni á samfélagsmiðlum, enda mikill fjöldi sem fékk bólusetningu í gær.

Dagskrárgerðarkonan Lóa Björk Björnsdóttir reynir þó að slá á einkennin.