Innlent

Líf færist í hafnir landsins á fyrsta degi strandveiðanna

Kristján Már Unnarsson skrifar
Arthur Bogason, formaður Landssambands smábátaeigenda, í Reykjavíkurhöfn í dag.
Arthur Bogason, formaður Landssambands smábátaeigenda, í Reykjavíkurhöfn í dag. Egill Aðalsteinsson

Fyrsti dagur strandveiðanna var í dag og viðraði vel til sjóróðra um land allt. Um fimmtungi fleiri smábátasjómenn hafa sótt um veiðileyfi en á sama tíma í fyrra og er búist við að um sjöhundruð stundi veiðarnar í sumar.

Út frá tölum vaktstöðvar siglinga má ætla að um tvöhundruð strandveiðisjómenn hafi byrjað veiðarnar í dag. Þeirra á meðal var Þorvaldur Gunnlaugsson á Ásþóri RE, sem sigldi úr Reykjavík klukkan hálfsex í morgun og kom að landi rúmum ellefu tímum síðar en rætt var við hann í fréttum Stöðvar 2.

„Ég náði skammtinum, 760 kíló,“ sagði Þorvaldur sem varð fyrstur til að landa strandveiðiafla í Reykjavík þetta sumarið.

Þorvaldur Gunnlaugsson á Ásþóri RE er einn síðasti trillukarlinn í Reykjavík.Egill Aðalsteinsson

Forystumenn Landssambands smábátaeigenda, formaðurinn Arthur Bogason og framkvæmdastjórinn Örn Pálsson, voru mættir á bryggjuna enda telst þetta stór dagur í þeirra geira.

„Að sjálfsögðu. Það er búið að bíða í stóran hluta úr ári eftir því að þessi dagur renni upp. Og þá er náttúrlega bara gaman að lifa,“ segir Arthur.

Aflinn hjá Þorvaldi var eingöngu þorskur sem hann veiddi í Faxaflóa um sautján mílur norðvestur af borginni.

Um fjögurhundruð bátar eru þegar komnir með strandveiðileyfi en þeir verða sennilega hátt í sjöhundruð talsins í sumar. Gera má ráð fyrir að aflanum verði landað í um sextíu höfnum hringinn í kringum landið, samkvæmt tölum Fiskistofu.

„Það eru umtalsvert fleiri bátar búnir að sækja um heldur en á sama tíma í fyrra. Munar alveg einum sjötíu bátum, minnir mig, eða tuttugu prósentum, eða eitthvað svoleiðis,“ segir Arthur og telur bágt atvinnuástand skýra fjölgun en einnig daprar horfur í grásleppunni.

Ásþór siglir að bryggju í Reykjavíkurhöfn síðdegis.Egill Aðalsteinsson

Athygli vekur hve fáir stunda strandveiðarnar frá Reykjavík.

„Við erum örfáir eftir, því er ver og miður,“ segir Þorvaldur. „Þeir vilja allir fara vestur, ég skil ekkert í þeim,“ segir hann.

„Þetta breytir náttúrlega mestu á landsbyggðinni. Það færist líf í fjöldann allan af höfnum landsins.

Því miður í Reykjavík, fyrir 35-40 árum síðan, þá voru áttatíu til níutíu trillukarlar. Hann Valdi vinur okkar, sem er að landa hérna, hann er að verða nánast sá eini. En þetta er betra úti á landi,“ segir Arthur Bogason, formaður Landssambands smábátaeigenda.

Hér má sjá frétt Stöðvar 2:


Tengdar fréttir

Segir að í þessu árferði ætti að rýmka heimildir til strandveiða

Rýmri heimildir til strandveiða ættu að vera hluti af viðspyrnu stjórnvalda gegn erfiðu atvinnuástandi þetta árið, að mati talsmanns smábátasjómanna. Bræla á fiskimiðunum á þessum fyrsta veiðidegi kom þó í veg fyrir að strandveiðarnar hæfust af krafti.

Hann landaði 32 kílóa skrímsli á Bakkafirði

Bakkafjörður er orðinn einn vinsælasti útgerðarstaður strandveiðisjómanna. Þar landa þeir stórþorski sem þeir veiða við Langanes og fagna mun hærra fiskverði en í fyrra.

Hún vill starfsheitið útgerðarprinsessan

Hún byrjaði tólf ára gömul á sjó og undirbýr nú sína fimmtu vertíð sem skipstjóri á strandveiðibát, stúlkan sem ögrar starfsheiti trillukarlsins.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.