Trump ákærður fyrir embættisbrot öðru sinni

Trump er fyrsti forsetinn í sögu Bandaríkjanna sem er ákærður tvisvar fyrir embættisbrot.

Alls greiddu 232 þingmenn atkvæði með ákærunni, þar af tíu Repúblikanar, og 197 gegn henni. Nú verður ákæran send til öldungadeildarinnar, þar sem nokkurs konar réttarhöld munu fara fram.

Þau réttarhöld munu ekki hefjast fyrr en eftir að Trump lætur af embætti og Joe Biden tekur við, þann 20. janúar. Mitch McConnell, leiðtogi núverandi meirihluta, segir í yfirlýsingu að það verði ekki hægt að klára réttarhöldin fyrir það og því sé best að byrja þau ekki fyrr en eftir embættistökuna.

Hér að neðan má sjá umræðu dagins og atkvæðagreiðsluna undir lok þessa myndbands.

Til að sakfella Trump þyrftu tveir þriðju öldungadeildarþingmanna að greiða atkvæði með sakfellingu. Í kjölfar þess væri svo hægt að halda aðra atkvæðagreiðslu til að meina Trump að bjóða sig aftur fram til embættis. Það þyrfti einfaldur meirihluti að samþykkja.

Trump er í raun ákærður fyrir að hvetja til uppreisnar og snýr sérstaklega að hlutverki forsetans í því að æsa fólk upp, sem á endanum braut sér leið inn í þinghús Bandaríkjanna þann 6. janúar, með því markmiði að stöðva formlega staðfestingu úrslita forsetakosninganna í nóvember.

Trump hefur um mánaðaskeið haldið því fram að kosningunum hafi verið stolið af honum með umfangsmiklu kosningasvindli. Engar vísbendingar um slíkt svindl hafa litið dagsins ljós. Trump og bandamenn hans hafa tapað tugum dómsmála eða dómarar hafnað þeim, og rannsóknir og endurtalningar hafa ekki leitt neitt í ljós.

Minnst fimm manns eru dánir vegna árásarinnar. Þar á meðal lögregluþjónn sem sagður er hafa fengið slökkvitæki í höfuðið og kona sem skotin var af löggæslumanni þegar hún var að reyna að brjóta sér leið inn í þingsal, þar sem vopnaðir menn stóðu vörð.

Trump hélt ræðu fyrir utan Hvíta húsið skömmu fyrir árásina á þinghúsið þar sem hann sagði þúsundum stuðningsmanna sinna enn og aftur að kosningunum hefði verið stolið af honum. Hann sagði einnig að stuðningsmenn hans þyrftu að berjast til að bjarga lífi þeirra. Hvatti hann fólkið til að gera óánægju sína ljósa við þinghúsið.

Hann sagði þó í gær að hann bæri enga ábyrgð á árásinni og sakaði Demókrata um að valda reiði og deilum með ákærunni.

Trump sendi frá sér yfirlýsingu fyrr í kvöld, þar sem hann sagði að hann væri mótfallinn ofbeldi í tengslum við mótmæli sem búist er við að muni eiga sér stað í kringum embættistöku Bidens.

Í kvöld bárust fregnir af því að þúsundir þjóðvarðsliða sem eru nú í Washington DC vegna áðurnefndra væntanlegra mótmæla hafi verið varaðir við því að grunur leiki á að öfgamenn ætli sér að nota sprengjur í árásum í höfuðborginni í tengslum við embættistöku Bidens og að mótmælendur gætu verið þungvopnaðir á götum Washington DC.

Sjá einnig: FBI varar við mótmælum og ofbeldi víða um Bandaríkin

Hann sagðist ekki standa fyrir slíkt og það gerðu Bandaríkin ekki heldur. Því kallaði hann eftir ró og friði.

Trump sagði þó ekkert um kosningarnar sjálfar og sigur Bidens.

Áður en atkvæðagreiðslan fór fram stigu fjölmargir þingmenn fram og gerðu grein fyrir því hvernig þeir myndu greiða atkvæði. Það var misgott skapið í þingmönnum bæði Repúblikanaflokksins og Demókrataflokksins.

Margir Repúblikanar sökuðu Demókrata um að vera ákæruóða og að hata Trump. Aðrir kölluðu eftir því að sár þjóðarinnar yrðu grædd og þingmenn kæmu saman í því að ákæra Trump ekki.

Demókratar sögðu ljóst að Trump hefði brotið af sér og ýtt undir árásina á þingið. Bæði með ræðu sinni fyrir árásina og ítrekaðar staðhæfingar um að svindlað hafi verið í forsetakosningum. Ekki væri hægt að leyfa honum að komast upp með það ámælislaust og sömuleiðis yrði að koma í veg fyrir að hann byði sig aftur fram til embættis.

Trump er meðal annars sagður hafa velt vöngum yfir því að bjóða sig aftur fram til forseta í kosningunum árið 2024.

Hér má sjá stutta samantekt AP fréttaveitunnar þar sem sýndiri eru bútar úr ræðum þingmanna.

Trump var síðast ákærður fyrir embættisbrot í lok árs 2019, eftir að hann reyndi að þvinga Vólódómír Selenskí, forseta Úkraínu, til að tilkynna að yfirvöld í Úkraínu væru að rannsaka Joe Biden, sem var þá líklegastur til að bjóða sig fram gegn Trump.

Hann var þá sýknaður af þingmönnum öldungadeildarinnar þar sem Repúblikanar voru í meirihluta. Repúblikaninn Mitt Romney, varð þá fyrsti öldungadeildarþingmaður Bandaríkjanna til að greiða atkvæði gegn forseta í sama flokki.