Björn Bergmann: Helvíti hjá Wolves

Björn Bergmann Sigurðarson er ánægður með að vera kominn aftur til Noregs eftir slæma tíma hjá Wolverhampton Wolves í Englandi.

Björn var keyptur til Wolves árið 2012 er norski þjálfarinn Ståle Solbakken var hjá liðinu. Wolves féll úr ensku B-deildinni og eftir að Solbakken var rekinn fékk Björn Bergmann fá tækifæri.

„Það er frábært að geta sýnt að maður getur gert meira en að sitja bara á bekknum,“ sagði Björn Bergmann í samtali við norska fjölmiðla en fréttavefur Sky Sports fjallaði um málið í gær.

„Auðvitað efast maður um sjálfan sig þegar maður er ekki notaður. Sérstaklega þegar maður finnur að það skiptir engu máli hvort maður standi sig vel á æfingum. Maður fær einfaldlega þau skilaboð að maður sé ekki í hópnum.“

„Í slíkum aðstæðum vill maður bara láta sig hverfa. Þetta verður að hreinasta helvíti. Það var því frábært að Molde vildi fá mig og að ég komst til baka.“

„Mér líður eins og heima hjá mér í Noregi. Strákarnir í liðinu eru frábærir en það er mjög erfitt að eignast vini í Englandi. Hér förum við saman út að borða og þess háttar.“

„Það er allt öðruvísi að vera hér. Nú finnst mér að ferillinn minn sé á réttri leið á nýjan leik.“