Kristinn Steindórsson: Rölti bara um völlinn og þefa af honum

Kristinn Steindórsson, besti leikmaður 8.umferðar Pepsi-deilar karla að mati Fréttablaðsins, hefur farið á kostum með Breiðabliki í deildinni í sumar og skorað átta mörk eða mark að meðaltali í leik. Öll mörkin hafa komið á heimavelli en Kristinn kann vel við sig á vellinum enda starfar hann þar. Hann segist vera í nánum tengslum við völlinn.

„Ég mæti á völlinn, tek hálftíma í öðrum teignum og svo hálftíma í hinum. Síðan dvel ég aðeins inni á miðjunni og rölti svo bara um völlinn og þefa af honum," segir Kristinn í léttum tón.

Blikar fóru fýluferð vestur á Ísafjörð í síðustu viku þar sem liðið datt út úr Valitor-bikarnum gegn BÍ/Bolungarvík. Úrslitin vöktu mikla athygli og voru mikil vonbrigði fyrir Blika.

„Þetta var ekki alveg það sem við bjuggumst við. Við tókum fimmtudagskvöldið og svo föstudaginn fram að æfingu í að jafna okkur. Svo ræddum við saman og ákváðum að gleyma þeim leik. Það þýddi ekkert að staldra við, því það var leikur framundan gegn Keflavík. Við gíruðum okkur upp í þann leik, komum hópnum saman og náðum flottum úrslitum," segir Kristinn.

Blikar hafa verið í þjónustu hjá Capacent síðustu tvö tímabil. Laugardaginn fyrir leikinn gegn Keflavík var hópeflisstund með fulltrúum fyrirtækisins.

„Við fórum í létta leiki og fengum hópinn til þess að vinna saman. Þetta snýst bara um að fá menn til þess að hugsa og tala saman. Gera eitthvað annað en að vera bara á æfingum," segir markahrókurinn.

Kristinn hefur fagnað mörkum sínum í sumar með einkennilegri handahreyfingu. Hann kallar fagnið „Svaninn" sem hafi upphaflega verið refsing eftir að hann tapaði fyrir vini sínum, Arnari Hólm Einarssyni leikmanni Álftaness, í ballskák.

„Það var ákveðið að sigurvegarinn fengi að velja fagnaðarlæti fyrir hinn í fyrsta leik. Hann vann þannig að ég þurfti að taka fagnið þá. Einhverra hluta vegna hélt ég þessu áfram, það var að ganga vel þannig að ég sé enga ástæðu til að breyta," segir Kristinn.

Kristinn er langmarkahæstur í deildinni og telur sig alveg geta orðið markakóngur.

„Ég ætti að geta náð því en ég er ekkert að hugsa sérstaklega um það. Liðið þarf bara að ná í fleiri stig og komast ofar í töflunni," segir Kristinn að lokum.