Neitar að hafa þegið mútur

Kínverski stjórnmálamaðurinn Bo Xilai neitar að hafa þegið mútur frá kaupsýslumönnum og hélt uppi líflegri vörn við réttarhöldin, sem snúast um eitt stærsta hneykslið í gjörvallri stjórnmálasögu Kína.

Hann segist hafa verið þvingaður til að játa á sig sakir í yfirheyrslum en ákærulisti saksóknara er langur og skrautlegur.

„Ég er ekki fullkominn maður og ekki viljasterkur. Ég get tekið ábyrgð á því,” sagði Bo. „En hvað varðar grundvallar staðreyndir um það hvort ég er sekur eða saklaus, þá verð ég að fá að láta í mér heyra.”

Talið er fullvíst að réttarhöldin endi með sakfellingu hans, en málsvörnin er síðasta tækifæri hans til að endurheimta eitthvað af þeirri virðingu sem hann naut, þegar hann var einn vinsælasti stjórnmálamaður landsins.

Málaferlin gegn honum tengjast einnig morðmáli, því eiginkona hans, Gu Kailai, var dæmd fyrir morð á breskum kaupsýslumanni. Hún hlaut skilorðsbundinn líflátsdóm fyrir nokkrum dögum.