Guardian vill ekki að lögregla skoði gögnin

Breska fjölmiðlafyrirtækið Guardian krafðist þess fyrir dómi í dag að lögbann yrði sett á til að koma í veg fyrir að lögregla fari yfir þau gögn sem tekin voru af David Miranda þegar hann var tekinn til yfirheyrslu á Heathrow-flugvelli um liðna helgi.

Miranda er sambýlismaður blaðamannsins Glenn Greenwald og hefur aðstoðað hann við fréttaskrif um eftirlitsstarfsemi bandarískra stjórnvalda byggt á uppljóstrunum.

Mikla athygli vakti því þegar Miranda var stöðvaður á leið frá Berlín til heimalands hans, Brasíliu, á grundvelli laga sem miða að því að koma í veg fyrir hryðjuverk. Ekki síst vegna þess að honum var haldið í rétt tæpar níu klukkustundir, sem er hámark þess sem lögin heimila. Einungis broti af þeim sem stöðvaðir eru á þessum forsendum er haldið lengur en eina klukkustund.

Áður en Miranda var sleppt úr haldi gerði lögregla upptæka ýmsa muni sem hann hafði með sér, meðal annars tölvu og minnislykla.

Lögmaður Miranda hefur sótt um lögbann á haldlagningu gagnanna, en lögmaður lögreglunnar, Jonathan Laidlaw að nafni, segir að lögregla hafi þegar hafið störf við að fara yfir gögnin.

„Það sem við höfum þegar skoðað felur í sér, að mati lögreglunnar, afar viðkvæmar upplýsingar sem gætu haft alvarleg áhrif á öryggi almennings og þess vegna hefur lögregla hafið rannsókn á málinu. Það er því fullt tilefni til þess að halda áfram að skoða gögnin.“

Lögregla heldur því auk þess fram að afskiptin af Miranda hafi verið lögum samkvæmt, og innanríkisráðherra stendur með gjörðum þeirra.