Allt í lagi takk herra -síðustu orðin frá tyrknesku vélinni

Flugstjóri tyrknesku farþegaþotunnar sem fórst í aðflugi að Schiphol flugvelli í Amsterdam á miðvikudag var sallarólegur í síðustu samskiptum sínum við flugturninn.

Flugmaður: -Tyrknesk 1951 (kallmerki vélarinnar) er að lækka sig úr sjöþúsund feta hæð.

Flugturn: -Tyrknesk 1951 halló, lækkaðu flugið niður í fjögur þúsund fet, hraðinn er góður fyrir blindaðflug að braut 1-8 hægri.

Flugumferðarstjórinn gaf svo flugmanninum upp bylgjulengdina sem hann átti að nota til þess að hafa samband við turninn eftir að vélin var lent. Síðustu orðin frá flugvélinni voru; -Allt í lagi takk herra.

Andartaki síðar skall vélin til jarðar. Eitthundrað þrjátíu og fjórir voru um borð. Níu létu lífið. Fimm þeirra voru í áhöfn vélarinnar, þar á meðal báðir flugmennirnir.