Sögulegar viðræður Bandaríkja og Norður-Kóreu

Viðræður erindreka Bandaríkjamanna og Norður-Kóreu sem hefjast í New York í dag marka þáttaskil. Þetta eru fyrstu opinberu tvíhliða viðræður ríkjanna síðan í Kóreustríðinu sem lauk árið 1953.

Meðal þess sem rætt verður á fundinum er hvort Bandaríkjamenn taki Norður-Kóreu af lista yfir hryðjuverkaþjóðir og aflétti viðskiptabönnum á landið. Fundirnir nú eru haldnir eftir að Norður-Kóreumenn samþykktu fyrir hálfum öðrum mánuði að láta af kjarnorkuáætlunum sínum í viðræðum sex ríkja í Peking.

Meðal þess sem samið var um að Norður-Kórea fengi í staðinn voru einmitt tvíhliða viðræður við Bandaríkinn. Þeir sem leiða munu samninganefndir ríkjanna eru varaforsætisráðherrarnir Christopher Hill og Kim Kye-gwan, en báðir hafa leitt viðræðurnar um kjarnorkumálin fyrir sínar þjóðir.

Kim snæddi kvöldverð í gær með samtökum sem styðja jákvæð samskipti við Kóreuríkin og þar hitti hann meðal nanars tvo fyrrverandi utanríkisráðherra Bandaríkjanna, þau Madaleine Albright og Henry Kissinger. Albright sagði þau hafa átt í gefandi og vingjarnlegum samræðum.

Sem fyrr segir markar fundurinn þáttaskil þó ekki sé á stefnuskránni að semja um opinbert og formlegt samkrull ríkjanna heldur einungis um hryðjuverkaklausuna annars vegar og þá efnahagsaðstoð sem Bandaríkjamenn lofuðu í sex ríkja viðræðunum hins vegar.

Ekki eru nema fimm ár síðan George Bush forseti sagði í stefnuræðu að Norður-Kórea væri eitt af öxulveldum hins illa en nú er ljóst að það má vonast eftir komandi þýðu í samskiptum ríkjanna.