Skilaboðin eiga að vera: setjumst niður og leysum málið

Oddný Sturludóttir, formaður skóla- og frístundaráðs í Reykjavíkurborg, segir að í nær öllum tilfellum séu mál skuldugra foreldra sem vilja hafa börn á frístundaheimilum leyst og aðeins sárasjaldan komi fyrir að börn fá ekki inni á frístundaheimilum.

Í viðtali í útvarpsþættinum Reykjavík Síðdegis á Bylgjunni ræddi Oddný um fréttir dagsins þess efnis að fyrir kæmi að börnum væri vísað af frístundaheimilum vegna skulda foreldra. „Þetta er fullmikil einföldun," segir hún en viðurkennir þó að það komi fyrir enda þurfi Borgin að vinna eftir innheimtureglum.

„Skilaboðin eiga alltaf að vera: setjumst niður og reynum að finna út úr þessu," segir hún og telur að ef fólk sýni vilja til að leysa málin og greiða upp skuldir þá séu borgaryfirvöld mjög lipur að veita aukinn tíma og á meðan sé engum börnum vísað úr vistun.

Án þess að hún geti nefnt nákvæma tölu viðurkennir hún þó að nokkur mál hafi komið upp þar sem börn þurfa að hverfa burt frá frístundaheimilum. „Það er sannarlega mjög erfitt fyrir börn í þeirri stöðu," segir hún.