Allt að tíu bílar keyrðu á konu á Sjálandi

Danska lögreglan telur að allt að tíu bílar hafi ekið á konu sem lést í umferðaróhappi á hraðbraut á Sjálandi í morgunsárið. Samkvæmt frétt Jótlandspóstsins hringdi kona í lögreglu um klukkan hálf sjö í morgun og sagðist hafa ekið á gangandi vegfaranda á hraðbrautinni milli Borup og Ringsted.

Fyrst gekk lögreglan út frá því að sú sem tilkynnti slysið hafi keyrt á konuna, en við nánari eftirgrennslan þótti líklegra að allt að tíu bílar hafi ekið yfir konuna. Slysið átti sér stað í myrkri þar sem þung og mikil umferð var.

Ekki er enn ljóst hvers vegna konan var úti á götu, en talið er að bíll hennar hafi bilað og hún lagt honum upp á umferðareyju milli akreina áður en hún gekk út á akbrautina.