Forseti Aserbaídsjan endurkjörinn

Ilham Alíjev, forseti Aserbaídsjan, var endurkjörinn með miklum yfirburðum í kosningum sem fóru fram í dag, samkvæmt útgönguspám. Hann er talinn hafa hlotið um 84 prósent atkvæða.

Þetta er í annað skiptið sem Alíjev er endurkjörinn, en hann hefur verið forseti frá árinu 2003. Hann tók við af föður sínum Geidar sem hafði ríkt í landinu í nær þrjá áratugi, fyrst sem formaður kommúnistaflokksins í Aserbaídsjan og síðar sem forseti.

Helsti andstæðingur Alíjevs, sagnfræðingurinn, Jamíl Hasanlí, varð í öðru sæti með um átta prósent, en hann sakaði forsetann um margvísleg kosningasvik. Meðal annars hafi embættismenn fyllt kjörkassa með atkvæðaseðlum merktum forsetanum. Þá hafa alþjóðleg mannréttindasamtök sakað Alíjev um að setja óeðlilegan þrýsting á andstæðinga sína og hamlað þeim í kosningabaráttunni.

Þrátt fyrir allt hefur velmegun aukist umtalsvert í landinu síðustu ár, aðallega í krafti olíuauðlinda, auk þess sem hann hefur lagt áherslu á að auka samskipti við vesturlönd.