Fyrirskipar hernum að vera í viðbragðsstöðu

Barack Obama Bandaríkjaforseti segist ætla að fara eftir diplómatískum leiðum í Sýrlandsmálinu en hann hefur fyrirskipað hernum að vera í viðbragðsstöðu, skili þær ekki árangri.

Þetta sagði forsetinn í gærkvöldi í ræðu til þjóðar sinnar og bætti því við að hann hafi beðið fulltrúadeild bandaríkjaþings um að fresta afgreiðslu á tillögu sinni sem gerði ráð fyrir hernaðaraðgerðum gegn Sýrlendingum.

Þessi ákvörðun kemur í kjölfar þess að Sýrlendingar hafa fallist á tillögu Rússa sem gerir ráð fyrir að öllum efnavopnum í landinu verði komið í hendurnar á Sameinuðu þjóðunum.