Breskur þingmaður segir af sér vegna ákæru um nauðgun

Íhaldsmaðurinn Nigel Evans, sem er einn af varaforsetum neðrideildar breska þingsins hefur sagt af sér eftir að saksóknari ákvað að ákæra hann fyrir kynferðisbrot og nauðgun. Sjö karlmenn hafa sakað hann um að hafa brotið gegn sér.

Evans þvertekur fyrir ásakanirnar og segist ætla að verja sig fyrir rétti. Árásirnar eiga að hafa átt sér stað á löngu tímabili eða frá 2002 og fram til apríl á þessu ári. Evans var fyrst handtekinn vegna málsins í maí og svo aftur í gær áður en ákæra var gefin út.