Deilt um orðalag í ályktun um Sýrland

Rússar, Bandaríkin og fleiri ríki deila nú um orðalag í væntanlegri ályktunartillögu, sem lögð verður fram í öryggisráði Sameinuðu þjóðanna um efnavopnanotkun Sýrlendinga.

Barack Obama Bandaríkjaforseti hefur frestað atkvæðagreiðslu í þinginu um heimild til hernaðar gegn Sýrlandsstjórn. 

Þess í stað ætlar hann að láta reyna á samningaleiðina, en segist ætla að hafa herinn áfram í viðbragðsstöðu.

Sýrlandsstjórn féllst í gær á hugmyndir Rússa um að efnavopnin í Sýrlandi yrðu sett undir alþjóðlegt eftirlit. Jafnframt sögðust Sýrlendingar ætla að undirrita alþjóðasamning um bann við efnavopnum, sem flest aðildarríki Sameinuðu þjóðanna hafa fyrir löngu gerst aðilar að. Þar með hafa Sýrlendingar í raun fallist á að efnavopnunum verði eytt.

Bandaríkjamenn hafa þó áhyggjur af því að Sýrlandsstjórn hafi þarna einungis gripið tækifæri til þess að tefja málin, og vilja að ályktun Sameinuðu þjóðanna tryggi að Sýrlendingar efni þessi loforð.

Rússar, sem hafa neitunarvald í öryggisráðinu, hafa hafnað hugmyndum Frakka og Bandaríkjamanna um harðorða ályktun, sem tryggði að standi Sýrlendingar ekki við loforðin muni það hafa í för með sér „mjög alvarlegar afleiðingar.”

Sýrlensk stjórnvöld hafa hins vegar strax í dag dregið að nokkru í land. Þannig sagði Ali Haidar, ráðherra í stjórn Sýrlands, í viðtali við AP fréttastofuna að Sýrlendingar væru því aðeins reiðubúnir til að undirrita samninginn, ef það yrði ekki gert undir þrýstingi frá erlendum ríkjum.

Hann sagði efnavopn vera „kjarnorkuvopn hinna fátæku” og Sýrlendingar hefðu komið sér þeim upp fyrst og fremst til að tryggja hernaðarlegt jafnvægi gagnvart Ísrael, „óvini sem við höfum verið að berjast við í sextíu ár.”

Allt stefnir því í erfiðar og flóknar samningaviðræður milli þessara ríkja.