Mancini: Lærið að vinna án Carlos Tevez

Carlos Tevez verður í leikbanni um helgina þegar Manchester City mætir hans gamla félagi West Ham og það gæti skapað vandræði fyrir City-liðið enda hefur Tevez verið allt í öllu í sóknarleik liðsins.

Roberto Mancini, stjóri Manchester City, veit vel af þessarri umræðu og hefur nú skorað á sína leikmenn að sanna það að þeir treysti ekki bara á litla Argentínumanninn sinn sem hefur komið með beinum hætti af 14 af 21 marki liðsins í ensku úrvalsdeildinni (10 mörk og 4 stoðsendingar).

„Þetta er tíminn þar sem við verðum að vinna án Carlos. Hann er frábær leikmaður og einn af þeim mikilvægustu í heimi. Hann er því mjög mikilvægur fyrir okkur en það er nauðsynlegt fyrir okkur að aðrir leikmenn stígi fram og taki meiri ábyrgð," sagði Roberto Mancini.

Manchester City hefur aðeins unnið einn leik á tímabilinu þar sem Carlos Tevez hefur ekki verið meðal markaskorara en það var í 2-0 sigri á West Bromwich Albion.

„Við verðum að bæta okkur og það er því mikilvægt að við förum að skora mörk í gegnum aðra leikmenn eins og Mario [Balotelli], Yaya [Touré], Jô og [Adam] Johnson. Við verðum að læra að vinna án Carlos Tevez," sagði Mancini.

„Carlos skapar alltaf mikla hættu í vítateig andstæðinganna en ef við höldum áfram að spila fótbolta eins og á móti Bolton Wanderers þá getum við unnið án hans," sagði

„Þetta verður erfiður leikur á laugardaginn því ég tel að West Ham eigi ekki skilið að vera í botnsætinu. Þeir eru með góða leikmenn og góðan stjóra þannig að þetta er undarlega staða sem þeir eru í. Við fengum viðvörun þegar þeir unnu Manchester United í deildarbikarnum en þeir hafa annars spilað vel undanfarinn mánuð. Við þurfum að spila mjög vel ef að við ætlum að vinna á Upton Park," sagði Mancini.