Fótbolti

Gaupi hitti Ísak Bergmann fyrst á Shellmótinu fyrir átta árum

Óskar Ófeigur Jónsson skrifar
Ísak Bergmann Jóhannesson með félögum sínum í Skagaliðinu fyrir átta árum þegar hann var aðeins níu ára gamall. Hér er hann í viðtalinu við Gaupa.
Ísak Bergmann Jóhannesson með félögum sínum í Skagaliðinu fyrir átta árum þegar hann var aðeins níu ára gamall. Hér er hann í viðtalinu við Gaupa. Skjámynd/S2 Sport

Ísak Bergmann Jóhannesson tók mörg risaskref á árinu 2020 en það er ekki langt síðan að þessi stórefnilegi knattspyrnumaður var að gera góða hluti á 6.flokksmóti á Íslandi.

Árið 2020 hefur verið viðburðaríkt hjá Skagamanninum Ísaki Bergmann Jóhannessyni sem ætlar að gera upp árið í viðtali við Gaupa í kvöldfréttum Stöðvar tvö.

Ísak Bergmann Jóhannesson stimplaði sig inn sem fastamaður hjá einu besta liði sænsku deildarinnar, var lykilmaður hjá 21 árs landsliðinu sem komst inn á EM og spilaði sinn fyrsta A-landsleik á Wembley. Þetta gerði hann allt þrátt fyrir að vera aðeins sautján ára gamall.

Guðjón Guðmundsson hefur fjallað mikið um krakkamótin á Stöð 2 Sport undanfarin ár og hann fann algjört gull þegar hann var að undirbúa viðtalið við Ísak Bergmann á dögunum.

Gaupi fann nefnilega átta ára gamalt myndband þar sem sést þegar hann hitti Ísak Bergmann og félaga í 6. flokki Skagamanna eftir leik á Shellmótinu í Vestmannaeyjum.

Gaupi talar þarna um næsta gullaldarlið Skagamanna en einhverjir strákanna eru þegar komnir út til erlendra félaga eins og þeir Ísak Bergmann, Oliver Stefánsson og Hákon Arnar Haraldsson.

Guðjón ræddi meðal annars stuttlega við Ísak Bergmann sem var þarna að spila upp fyrir sig.

„Já ég náði einum þrumufleyg alveg eins og pabbi minn,“ sagði Ísak Bergmann brosandi sumarið 2012 en hann viðurkenndi jafnframt að hann gæti bara skotið með vinstri. Guðjón spurði Ísak út í þessa stund þegar þeir hittust fyrst á mótinu í Eyjum og hvort hann hafi verið þá farinn að hugsa um það þá að verða atvinnumaður.

„Nei kannski ekki þá. Þarna er maður fyrst og fremst að leika sér með félögunum og hafa gaman. Maður á þegar maður er yngri bara gera það sem maður elskar og hafa gaman og spila fótbolta. Að vera með félögunum úti allan daginn. Fljótlega eftir það, þegar maður var kominn á N1 mótið, 12 til 13 ára gamall, þá er maður kannski farinn að spá aðeins meira í því að geta orðið atvinnumaður,“ sagði Ísak Bergmann.

Hér fyrir neðan má sjá þegar Gaupi hitti Ísak Bergmann fyrst fyrir átta árum síðan.

Klippa: Gaupi hitti Ísak Bergmann fyrst á Shellmótinu í Eyjum

Guðjón Guðmundsson verður með viðtal við Ísak Bergmann Jóhannesson í fréttum Stöðvar tvö í kvöld og lengri útgáfa af því mun síðan birtast hér inn á Vísi.




Fleiri fréttir

Sjá meira


×