Rosaleg röð í skimun sem nær langt upp í Ármúla

Mikið álag er við sýnatöku Heilsugæslunnar á höfuðborgarsvæðinu í dag. Sýnataka vegna kórónuveirunnar sem veldur Covid-19 fer fram á horni Grensásvegar og Suðurlandsbrautar þar sem Orkuhúsið var áður til húsa.

Röð í skimatöku nær Ármúlann, langleiðina upp að höfuðstöðvum Símans.

94 greindust með kórónuveiruna innanlands í gær. Fjörutíu þeirra voru í sóttkví. Þá voru átta landamærasmit. Tuttugu og þrír liggja nú á Landspítalanum með kórónuveiruna.

Á fjórða þúsund manns á höfuðborgarsvæðinu eru í sóttkví og tæplega 700 í einangrun.

Agnar Darri Sverrisson verkefnastjóri sýnatöku hjá heilsugæslunni var spurður út í þá staðreynd að röðin væri rosaleg í dag.

„Það eru engar ýkjur,“ segir Agnar Darri. Ástæðan er sú að svo margir einstaklingar eru að koma í seinni sýnatöku úr sóttkví. Mun færri séu í einkennissýnatöku og þar er minni bið eftir sýnatöku.

„Það voru rúmlega 100 manns skráðir á hvert korter hjá okkur. Menn þurfa bara aðeins að bíða,“ segir Agnar Darri yfirvegaður.

Svona var staðan um klukkan 10:50

Svona var staðan svo klukkan 12:58

Fréttin var uppfærð með nýjum myndum klukkan 12:58.