Fangelsisyfirvöld í New York-ríki hafa hafnað reynslulausnarbeiðni Mark David Chapman, mannsins sem skaut Bítilinn John Lennon til bana árið 1980. Um er að ræða ellefta skiptið sem ekki er gengið að óskum hins 65 ára gamla Chapman.

Chapman færði rök fyrir máli sínu fyrir nefnd 19. ágúst síðastliðinn í Wende fangelsinu austur af borginni Buffalo. Þar hefur hann afplánað lífstíðardóm sem hann hlaut fyrir morðið sem hann framdi 8. desember 1980, nokkrum klukkustundum eftir að Lennon hafði áritað fyrir hann plötu.

Chapman sótti fyrst um reynslulausn eftir að hafa afplánað í 20 ár árið 2000 og hefur hann sótt um á tveggja ára fresti síðan þá. Chapman segist sjá meira og meira eftir morðinu eftir því sem árin líða en farið verður yfir möguleika hans á reynslulausn í ágúst 2022.