Grunur um fleiri smit íranskra valdamanna

Fleiri halda áfram að smitast af Covid-19, sjúkdómnum sem nýja kórónuveiran veldur. Rúm áttatíu þúsund hafa nú sýkst og um 2.700 látið lífið. Hægst hefur á dreifingunni á meginlandi Kína, þar sem flest smitin eru, en veiran heldur áfram að dreifa úr sér annars staðar. Króatía og Austurríki bættust á listann í gær.

Staðan í Íran er orðin nokkuð slæm, stjórnvöld segja að 95 hafi smitast og fimmtán látið lífið. Hassan Rouhani forseti reyndi að stappa stálinu í landsmenn í dag. Sagði að landsmenn mættu ekki láta stýrast af ótta.

Þingmaður írönsku stjórnarandstöðunnar frá borginni Qom hefur lýst efasemdum um opinberu tölurnar þar í landi og sagt að fimmtíu hafi farist í Qom einni.

Það er hins vegar ljóst að sjúkdómurinn hefur lagst á hátt setta íranska embættismenn. Iraj Harirchi, aðstoðarheilbrigðismálaráðherra sem sést hér til vinstri á blaðamannafundi í gær, staðfesti í dag að hann hafði smitast. Grunur leikur á um að hann hafi smitað manninn til hægri, Ali Rabiei, upplýsingafulltrúa ríkisstjórnarinnar.

Blaðamaður NBC í Íran greindi frá þessu á Twitter og sagði að Rabiei hefði svo mögulega smitað iðnaðarráðherra landsins. Þingmaður frá höfuðborginni Teheran hefur svo sömuleiðis staðfest að hann sé veikur.