Telja mildi að enginn slasaðist við eftirför í miðbæ Reykjavíkur
Skömmu fyrir klukkan fjögur í dag barst lögreglunni á höfuðborgarsvæðinu tilkynning um að kona í annarlegu ástandi hefði stolið bíl við Sundahöfn.
Að því er fram kemur í tilkynningu lögreglu var brugðist skjótt við og konunni veitt eftirför uns tókst að stöðva för hennar í Lækjargötu, nærri Vonarstræti.
Var konan handtekin og flutt á lögreglustöð en lögregla telur mildi að ekki hlaust slys af „enda virti konan fáar ef nokkrar umferðarreglur á leið sinni,“ eins og segir í tilkynningu lögreglu.
Ók hún meðal annars gegn rauðu ljósi og mátti litlu mun að hún lenti í árekstri við aðra bíla „á meðan á þessum glórulausa akstri stóð.“
Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.
