Innlent

Þrír góðir dagar á undan næstu lægð

Kristín Ólafsdóttir skrifar
Þessi mynd var tekin á höfuðborgarsvæðinni í lægðinni sem gekk yfir í síðustu viku.
Þessi mynd var tekin á höfuðborgarsvæðinni í lægðinni sem gekk yfir í síðustu viku. Vísir/vilhelm

Enn ein lægðin gengur nú yfir landið og ekki er búist við að lægi fyrr en á morgun. Þá er von á hæglætisveðri næstu daga en önnur lægð er þó í kortunum á sunnudag. Enn er hættu- og óvissustig í gildi vegna snjóflóðahættu og búist er við því að fjöldi flóða hafi fallið til viðbótar við þau sem þegar hafa verið staðfest.

Viðvaranir úr gildi strax í nótt

Vegum hefur víða verið lokað eða þeir ófærir á Vesturlandi, Vestfjörðum og Norðurlandi. Þannig var Skutulsfjarðarbraut lokað klukkan 10 í kvöld og veginum um Eyrarhlíð var einnig lokað. Athugað verður með opnun beggja vega í fyrramálið, samkvæmt upplýsingum á vef Vegagerðarinnar. Þá er ófært á sunnanverðu Snæfellsnesi, Svínadal og Laxárdalsheiði auk þess sem vegurinn um Holtavörðuheiði er enn lokaður.

Sjá einnig: Hnífsdalsvegur lokaður vegna snjóflóðs

Appelsínugul viðvörun á Norðurlandi vestra, Vestfjörðum og Breiðafirði er enn í gildi og gul viðvörun annars staðar á landinu nema á Suðurlandi og Austfjörðum. Veðrið mun ekki ganga alveg niður fyrr en eftir hádegi á morgun miðað við spár, þó að viðvaranir byrji að falla úr gildi strax í nótt.

„Það er jafn vindur upp í 20-28 metra á sekúndu á sunnanverðu Snæfellsnesinu til dæmis, og svipað víða á Vestfjörðum. Það er alveg mjög hvasst í þessum appelsínugulu [viðvörunum] en ekki jafnt hvasst í þeim gulu,“ segir Eiríkur Örn Jóhannesson, veðurfræðingur á Veðurstofu Íslands, í samtali við Vísi snemma á ellefta tímanum í kvöld.

Þá detti í hæglætisveður víðast hvar á landinu, með stöku éljum, seinni partinn á morgun og annað kvöld. Nokkur bið ætti að vera eftir næstu lægð, í það minnsta miðað við nær stöðugan lægðagang síðustu daga.

„Það ætti núna að verða fremur gott vetrarveður fimmtudag, föstudag og laugardag, hægur vindur og stöku él, frost víðast hvar. Við fáum þarna allavega þrjá góða daga, en svo stefnir í næstu lægð á sunnudaginn.“

Trausti Jóhannesson, snjóflóðasérfræðingur.Vísir/sigurjón

Bíða forvitin eftir því að kanna varnargarðana

Hættustig er enn í gildi á Ísafirði vegna snjóflóðahættu og óvissustig er á öllum norðanverðum Vestfjörðum. Iðnaðarhúsnæði þar var rýmt í gær og gátu starfsmenn þar ekki sótt vinnu. Þá var íbúum á einum sveitabæ í Bolungarvík ráðlagt að dvelja á öruggari stað meðan ástandið varir.

Snjóflóð féll síðdegis á veginn milli Ísafjarðar og Hnífsdals. Lítilli hópferðabifreið var ekið í jaðar flóðsins en engin slys urðu á fólki. Þá er einnig töluverð snjóflóðahætta á Austfjörðum.

Trausti Jóhannesson snjóflóðasérfræðingur hjá Veðurstofu Íslands sagði í kvöldfréttum Stöðvar 2 að vænta mætti úrkomubakka í nótt og þá gæti úrkoma aukist um tíma, einkum á Vestfjörðum. Fregnir höfðu borist af a.m.k. þremur snjóflóðum á Vestfjörðum í dag, þar af einu í lón Reiðhjallavirkjunar. Þá hafi ekki verið gert ráð fyrir frekari rýmingu og staðan hafði ekki breyst nú á ellefta tímanum.

„En við eigum von á því að það séu miklu fleiri flóð sem fallið hafa á veginn og í grennd við byggðina og bíðum svolítið forvitin eftir því að vita hvort einhver flóðanna hafi fallið á varnargarðanna á Flateyri eða önnur varnarmannvirki sem hafa verið byggð,“ sagði Trausti.


Tengdar fréttir

Óveðurslægð næsta sólarhringinn en svo birtir til

Vegir eru víða lokaðir á landinu vegna veðurs og ófærðar á meðan enn ein óveðurslægðin gengur yfir landið. Viðvaranir eru í gildi til að minnsta kosti klukkan þrjú á morgun.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.