Innlent

Ásmundur bað þrýstihóp í ferðaþjónustu afsökunar á Birni Leví

Jakob Bjarnar skrifar
Ekki er hlýtt milli þeirra Björns Levís og Ásmundar en á fundi aðila í ferðaþjónustu í gær sá Ásmundur sig knúinn til að biðjast afsökunar vegna orða Björns Levís um lobbíisma.
Ekki er hlýtt milli þeirra Björns Levís og Ásmundar en á fundi aðila í ferðaþjónustu í gær sá Ásmundur sig knúinn til að biðjast afsökunar vegna orða Björns Levís um lobbíisma. visir/vilhelm

Björn Leví Gunnarsson þingmaður Pírata vekur athygli á því á Facebooksíðu sinni að í gær hafi verið haldinn sérstakur fundur rekstraraðila ferðaþjónustunnar á hálendinu svo þingmanna sem ferðaþjónustufólkið bauð til á Skólabrú.

Björn Leví greinir frá þessu í pistli undir fyrirsögninni „Lobbíistatilkynning“. En á fundinum var fjallað um stofnun hálendisþjóðgarðs. Á fundinum sló í brýnu milli Björns Levís og Ásmundar Friðrikssonar þingmanns Sjálfstæðisflokksins.

„Í boði voru einhverjar fínar snittur og samtal við einhverja 20 rekstraraðila (lobbíista),“ segir Björn Leví.

Björn Leví kvaddi sér hljóðs á fundinum og spurði hvort fólk áttaði sig ekki á því hversu óviðeigandi svona lokaður fundur væri; þarna væri að vera að fjalla um mál þar sem opinberar umsagnir ættu að koma frá þessum aðilum sem hægt væri að ræða í opinberri samfélagsumræðu.

Björn Leví segir engar reglur til um það hvernig þingmenn eigi að umgangast lobbíista. Honum leið illa á fundi þrýstihóps úr ferðaþjónustunni, drakk bara vatn en sleppti snittunum. visir/vilhelm.

„Það er vægt til orða tekið að fólk tók ekki vel í þá spurningu og einn þingmaður meira að segja afsakaði fyrir framkomu mína. Það var mjög augljóst að nákvæmlega enginn þarna inni skildi hvernig samskipti kjörinna fulltrúa og lobbíista eiga að vera,“ segir Björn Leví.

Vildi hafa sagt Ásmundi að þegja

Sá þingmaður sem setti ofan í við Björn Leví og bað fundarmenn afsökunar á orðum hans er enginn annar en Ásmundur Friðriksson en þeir Björn hafa eldað grátt silfur meðal annars vegna aksturspeninga Ásmundar sem hafa verið mjög til umfjöllunar. Björn Leví segir í samtali við Vísi að það hafi farið kurr um salinn vegna orða sinna og hann hafi verið sakaður um að tala um fólk en ekki við það.

Spurður segist Björn Leví eftir á að hyggja sig ekki hafa brugðist nógu hart við orðum Ásmundar þegar hann bað hópinn afsökunar fyrir hönd þingmannanna:

„Ég hefði átt að segja honum að halda kjafti og að hann þyrfti ekki að vera siðferðisvörður fyrir mig. En ég sagði bara: Æi og búhú.“

Drakk bara vatn og leið illa á fundinum

Björn Leví segir ekkert að því að fólk hittist en það beri að greina frá slíku. Þannig hafi til dæmis einn á fundinum sagt að ferðaþjónustan „ætti engan þingmann“ en sá er einmitt fyrrverandi þingmaður, Magnús Orri Schram. Björn Leví segir að það séu engar reglur til á Íslandi um samskipti við lobbíista.

Ásmundur sagði fundinn hafa verið upplýsandi og þarna hafi komið fram mörg mikilvæg púsl sem vert er að hafa í huga nú þegar frumvarp um miðhálendið sé að koma úr umsagnarferli. visir/vilhelm

„Slíkir fundir, þrátt fyrir að það sé greint frá þeim, hafa áhrif á aðkomu kjörinna fulltrúa að málefnum. Nú hafa lobbíistar hitt mig á lokuðum fundi og sagt mér eitthvað sem enginn annar getur skoðað. Það þýðir að allur minn málflutningur í því máli verður að skoðast í því ljósi. Það á ekki að gera lítið úr svona vinnubrögðum, það hefur almennt séð áhrif á fólk að þiggja veitingar eða aðrar „smá“ gjafir.“

Björn Leví segir að með slíku móti sé verið að búa til velvild og það hafi áhrif, almennt séð.

„Ég þáði engar veitingar á þessum atburði nema vatn og leið satt best að segja illa á þessum fundi vegna þessara mála.

Ég var að gera mig vanhæfari til þess að fjalla um málefni hálendisþjóðgarðs með því að vera á þessum fundi í ásýnd einhvers hluta samfélagsins,“ segir þingmaðurinn.

Mikilvægur og upplýsandi fundur

Allt annað hljóð er í Ásmundi en Birni þegar Vísir heyrði í honum varðandi fundinni. Hann tekur skýrt fram að hann ætli sér ekki að skattyrðast við Björn Leví og alls ekki með milligöngu blaðamanns en segir þó að annað hvort sé nú þegar fólki er boðið í heimsókn að það sé kaffi á boðstólum. Ásmundur segir þennan fund hafa verið afar góðan og mikilvægan.

„Þetta var upplýsandi fundur og mikilvægt nú þegar umsagnarferlinu [um frumvarp um miðhálendisþjóðgarð] er að ljúka að við sáum á tánum um hvaða áhrif þetta hefur og á hverja. Þarna komu fram ný púsl sem fylla í myndina.

Við þurfum að hugsa þetta vel, tala saman og reyna að vera vinir en sjá ekki glæpamenn í öllum hornum,“ segir Ásmundur.

Ásmundur segir það mikilvægt fyrir þingmenn að kynnast skoðunum fólks. „Þetta er það sem þingmenn eru að gera alla daga; hitta fólk í atvinnulífinu og kippa í vagninn til að létta sporin ef svo ber undir.“


Tengdar fréttir



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.