Innlent

Dagur segir borgar­línuna betri fyrir alla á meðan Sig­mundur óttast kostnaðinn

Tryggvi Páll Tryggvason skrifar
Sigmundur Davíð Gunnlaugsson og Dagur B. Eggertsson virðast vera á öndverðum meiði.
Sigmundur Davíð Gunnlaugsson og Dagur B. Eggertsson virðast vera á öndverðum meiði. Vísir/Arnar/Baldur

Dagur B. Eggertsson borgarstjóri og Sigmundur Davíð Gunnlaugsson, formaður Miðflokksins, tókust á um borgarlínuna og samgöngumál á Sprengisandi á Bylgjunni í morgun. Dagur segir að framkvæmdirnar sem gert er ráð fyrir í samgöngusáttmála ríkis og borgar muni gera samgöngur á höfuðborginni betri fyrir alla, Sigmundur óttast hins vegar að borgarlínan geti komið sveitarfélögunum í fjárhagsvandræði.

Leiðin er nú greið fyrir borgarlínuna eftir að Alþingi veitti heimild til þess að stofna opinbert hlutafélag um uppbyggingu samgönguinnviða á höfuðborgarsvæðinu. Málið varðar samgöngusáttmálann svokallaða sem ríkið og sveitarfélögin á höfuðborgarsvæðinu undirrituðu í september og varðar meðal annars borgarlínuverkefnið.

Á öndverðum meiði

Þeir Dagur og Sigmundur Davíð virðast vera á öndverðum meiði um borgarlínuna en flokkur Sigmundar var sakaður um málþóf í umræðum um málið á þingi á dögunum. Sigmundur segist hafa þungar áhyggjur af því að kostnaður við framkvæmdir geti farið úr böndunum.

„Þetta er dæmigert innviðaverkefni, vanhugsað innviðaverkefni sem er til þess fallið að koma sveitarfélögum í langvarandi fjárhagsleg vandræði og þar með auka skattlagningu á íbúana. Markmið með þessu öllu, eða afleiðingin að minnsta kosti, er sú að þrengja annarri umferð og þar með láta fólk borga meira, langflesta, borga meira, fyrir að sitja lengur fastur í umferðinni,“ sagði Sigmundur Davíð á Sprengisandi í morgun.

Hlusta má á viðtalið við þá félaga í heild sinni hér að neðan.

Hann segir áætlaðan kostnað við framkvæmdina vera á reiki, en samgöngusáttmálinn sem meðal inniheldur borgarlínuna er upp á 120 milljarða sem skiptist á milli ríkisins, sveitarfélaga og tekna sem eiga að koma frá notendum.

„Svo er það kostnaðurinn. Hann virðist algjörlega vera í lausu lofti. Það virðist enginn vita hvað þetta muni kosta. Menn slá fram einhverjum tölum, 70-80 milljarðar, og miðað þá við eitthvað kílómetraverð úr erlendum borgum,“ sagði Sigmundur Davíð.

Pólítísk sátt þvert á flokka og sveitarfélög að mati Dags

Borgarstjóri lagði hins vegar áherslu á það að samgöngusáttmálinn væri niðurstaða þverpólítisks samráðs á milli sveitarfélaganna á höfuðborgarsvæðinu. Málið hefði ekki fæðst á einu eftirmiðdegi.

„Heldur fóru sveitarfélögin á höfuðborgarsvæðinu að stórum hluta í samvinnu við Vegagerðina í valkostagreiningu fyrir allnokkrum árum. Það var bæði skoðaðir valkostir varðandi þróun byggðar og varðandi mismunandi samsetningar og áherslur í samgöngumálum og samgöngukerfinu. Stóra verkefnið í þessu er að tækla stöðu samgöngumála eins og það er í dag en líka hugsa fyrir því að á höfuðborgarsvæðinu næstu 20 árin mun okkur fjölga um 70 þúsund. Þetta fólk þarf auðvitað að búa einhvers staðar,“ sagði Dagur.

Á þessari mynd má sjá fyrstu 25 stöðvarnar sem verða teknar í notkun í fyrsta áfanga Borgarlínu árið 2023.Borgarlína

Því þyrfti að finna lausn til þess að búa til skilvirka samgönguneti sem tæki til allra faramáta, sem á sama tíma myndi gagnast þeim sem þegar búa á höfuðborgarsvæðinu

„Þess vegna var stillt upp mismunandi leiðum í þessu og lagst yfir það þvert á sveitarfélög, þvert á pólitík, þvert á flokka með besta hugviti og ráðgjöf sem við áttum til úr hópi sérfræðinga. Þessi trausti grunnur og þessi blandaða leið með borgarlínu og stofnvegaframkvæmdum, ekki síður heildstæðu hjólastíganeti og svo framvegis nýtur stuðnings svo margra þvert á flokka,“ sagði Dagur.

Ástæðan væri einföld.

„Þetta er betra fyrir alla sem ætla að ferðast hér í umferðinni. Ekki bara þá sem vilja ferðast með almenningssamgöngum, ekki bara fyrir þá sem vilja hjóla heldur líka fyrir þá sem vilja ferðast einir í bíl.“


Tengdar fréttir

Lítill ávinningur fyrir 46 milljarða

Er líklegt að loftslagáætlanir sem hér eru boðaðar með ærnum tilkostnaði breyti einhverju um þróun tækninnar á heimsvísu í samgöngum, landbúnaði, iðnaði, orkuframleiðslu o.s.frv?

„Ímyndaðu þér nýtt samgöngunet“

Næsta stopp er gagnvirk sýning þar sem nýju samgönguneti Borgarlínu, Strætó, hjólastíga og deililausna eru gerð skil á áhugaverðan hátt. Sýningin er hluti af HönnunarMars hátíðinni í ár og stendur yfir í Ráðhúsi Reykjavíkur til 24.júní.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.