Erlent

Brimbrettamaður lést eftir árás hvítháfs

Kjartan Kjartansson skrifar
Sætþota var notuð til að koma fólki upp úr sjónum eftir að brimbrettamaðurinn varð fyrir árás hvítháfsins sem sést til vinstri á myndinni.
Sætþota var notuð til að koma fólki upp úr sjónum eftir að brimbrettamaðurinn varð fyrir árás hvítháfsins sem sést til vinstri á myndinni. AP/ABC/CH7/CH9

Þriggja metra langur hvítháfur réðst á brimbrettamann á sextugsaldri undan ströndum Ástralíu og lést maðurinn af sárum sínum í morgun. Þetta er þriðja mannskæða hákarlsárásin við Ástralíu á þessu ári.

Árásin átti sér stað við Kingscliff í norðanverðu Nýja Suður-Wales, um 800 kílómetra norður af Sydney. Breska ríkisútvarpið BBC segir að aðrir brimbrettamenn hafi komið manninum til aðstoðar og bægt hákarlinum frá. Allt kom þó fyrir ekki og lést maðurinn af sárum sínum á ströndinni. AP-fréttastofan segir að hákarlinn hafi bitið manninn aftan í annað lærið.

Nokkrar strandir á svæðinu voru rýmdar eftir árásina og verða þær lokaðar næsta sólarhringinn.

Hvítháfar eru sagðir á ferli á þessum slóðum á þessum tíma árs. Tveir aðrir hafa látist eftir að hákarlar réðust á þá á þessu ári. Í apríl lést 23 ára gamall landvörður í Queensland þegar hákarl réðst á hann við Kóralrifið mikla. Í janúar lést 57 ára gamall kafari undan ströndum Vestur-Ástralíu.

Talið er að hvítháfurinn hafi verið um þrír metrar á lengd.AP/ABC/CH7/CH9
Ástralía
Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Mest lesið


Fleiri fréttir

Sjá meira


×

Mest lesið