Liverpool vill selja þrjá leikmenn til þess að kaupa Werner

Liverpool er sagt reiðubúið til þess að selja þrjá leikmenn til þess að safna peningum til að kaupa framherja RB Leipzig, Timo Werner, en enskir fjölmiðlar greina frá þessu.

Werner er sagður hafa fundað með Jurgen Klopp, þjálfara Liverpool, í útgöngubanninu en borga þarf 52 milljónir punda til þess að losa Werner undan samningi sínum við þýska orkudrykkjaliðið.

Kórónuveiran hefur áhrif í Liverpool eins og á öðrum stöðum og samkvæmt erlendum fjölmiðlum eru Klopp og félagar tilbúnir að selja Xherdan Shaqiri, Harry Wilson og Marko Grujic til að geta keypt Werner.

Liverpool vonast til þess að fá um 27 milljónir punda fyrir Shaqiri og samanlagt 40 milljónir punda fyrir þá Wilson og Grujic sem eru nú á láni hjá Bournemouth og Herthu Berlín.