Wenger fær stuðning frá stjórnarformanni Arsenal

Ivan Gazidis stjórnarformaður Arsenal segir að það komi ekki til greina að láta Arsene Wenger knattspyrnustjóra liðsins fara frá liðinu þrátt fyrir afleitt gengi þess í upphafi tímabilsins. Arsenal hefur aðeins unnið einn leik af fyrstu fimm og er liðið í 17. sæti – einu sæti fyrir ofan fallsæti.

Margir af lykilmönnum Arsenal undanfarin ár eru farnir frá félaginu og má þar nefna Cesc Fabregas sem fór til Barcelona og Samir Nasri sem er nú hjá Manchester City.

Gazidis segir að Wenger sé enn rétti maðurinn í starfið. „Hann er ekki búinn á því, hann varð ekki allt í einu lélegur knattspyrnustjóri se m hefur misst tenginguna við fótboltann. Það er tómt kjaftæði. Við ætlum ekki að fara þá leið að reka hann.

Wenger hefur skorað á leikmenn liðsins að líta í eigin barm og íhuga stöðu liðsins vel. Liðið hefur fengið á sig 14 mörk fram til þessa í deildinni og varnarleikur liðsins er stærsta vandamálið.