Starfsmenn Man Utd fá bónusgreiðslur frá eigendum liðsins

Bandaríska Glazer fjölskyldan sem á enska úrvalsdeildarliðið Manchester United er án efa aðeins ofar á vinsældarlistanum hjá 500 starfsmönnum félagsins  í dag en í gær. Í bréfi sem starfsmenn fengu í gær frá eigendum félagsins var sagt frá því að allir starfsmenn fái bónusgreiðslu á árslaunin sem nemur um 8% af árslaunum hvers og eins. Um 920 milljónum ísl. kr. eða sem nemur um 5 milljónum punda.

David Gill stjórnarformaður félagsins fær líklega mest í sinn hlut eða sem nemur um 30 milljónum kr. en hann er með um 370 milljónir kr. í árslaun.

Sir Alex Ferguson knattspyrnustjóri Englandsmeistaraliðsins og leikmenn Man Utd fá ekkert í sinn hlut að þessu sinni.  Eigendur Man Utd vilja með þessu verðlauna starfsfólk félagsins fyrir góðan árangur á s.l. tímabili en félagið varð enskur meistari í 19. sinn og lék til úrslita í Meistaradeild Evrópu í þriðja sinn á síðustu fjórum árum.

Um 620 er á launaskrá hjá Manchester United á Old Trafford, æfingasvæðinu við Carrington og á skrifstofu félagsins í London. Þar af eru 520 sem eru ekki leikmenn, þjálfarar eða aðrir starfsmenn sem koma að daglegum störfum fótboltaliða Man Utd

Heildaársvelta Man Utd er um 55 milljarðar kr. eða sem nemur um 300 milljónum punda.