Agger rifbeinsbrotnaði á móti Tottenham

Daniel Agger, miðvörður Liverpool, rifbeinsbrotnaði í tapinu á móti Tottenham um síðustu helgi og verður frá í allt að einn mánuð. Kenny Dalglish, stjóri Liverpool, er þó ekki tilbúinn að gefa það út hvernig danski landsliðsmaðurinn snúi til baka en verði í það minnsta ekki með liðinu í næstu leikjum.

Daniel Agger fór af velli eftir aðeins 27 mínútur í 0-4 tapinu á móti Tottenham en hann hafði dottið illa í aðdraganda þess að Luca Modric kom Tottenahm í 1-0.

„Daniel er rifbeinsbrotinn og á í smá erfiðleikum," sagði Kenny Dalglish á blaðamannfundi í dag en Agger hefur verið fastamaður í liði hans þegar hann er heill. Agger hefur hinsvegar verið allt annað en heppinn með meiðsli á tíma sínum á Anfield.

Agger missir væntanlega af komandi leikjum Liverpool á móti Wolverhampton Wanderers, Everton og Manchester United í ensku úrvalsdeildinni en þetta er líka slæmt fyrir danska landsliðið sem spilar mikilvæga leiki á móti Kýpur og Portúgal í undankeppni EM í byrjun næsta mánaðar. Agger mun örugglega missa af þeim leikjum líka.