Umfjöllun: Guðjón Baldvinsson gerði þrennu er KR sigraði Fylki

KR vann öruggan sigur, 3-0, á Fylkismönnum í Pepsi-deild karla í knattspyrnu, en Guðjón Baldvinsson gerði 3 mörk í leiknum, öll í fyrri hálfleik.

Það sást strax á fyrstu mínútu leiksins hvert stefndi og KR-ingar réðu lofum og lögum frá byrjun. Fyrsta mark leiksins kom eftir korters leik þegar Guðjón Baldvinsson komst einn í gegnum vörn Fylkis eftir frábæra stungusendingu frá Baldri Sigurðssyni, leikmanni KR, og lagði boltann vel framhjá Bjarna Þórði Halldórssyni í marki heimamanna.

Tíu mínútum síðar skoraði Guðjón annað mark sitt í leiknum með skalla eftir sending frá Óskari Erni Haukssyni beint úr aukaspyrnu. Guðjón Baldvinsson fullkomnaði síðan þrennuna fjórum mínútum síðar þegar hann setti boltann í markið af stuttu færi inn í teig Fylkismann. Ótrúlegur leikur og staðan 3-0 fyrir KR eftir hálftíma leik.

Leikurinn róaðist heldur betur í síðari hálfleik, KR-ingar voru sáttir með sinn hlut og Fylkismenn gáfust í raun upp. KR-ingar fengu nokkur færi til að skora fleiri mörk og þá sérstaklega Guðjón Baldvinsson, en leiknum lauk með sigri KR-inga 3-0.

KR-ingar því komnir aftur á toppinn í Pepsi-deildinni með 23 stig. Leikur Fylkismanna virðist vera í lausu lofti og hafa þeir spilað skelfilega í síðustu tveimur leikjum liðsins.



Fylkir 0 – 3 KR

0-1 Guðjón Baldvinsson (14.)

0-2 Guðjón Baldvinsson (24.)

0-3 Guðjón Baldvinsson (28.)

Skot (á mark): 7 – 17 (4-9)

Varin skot: Bjarni 5 – 4 Hannes

Horn: 5 – 2

Aukaspyrnur fengnar:15– 21

Rangstöður: 1-0

Dómari: Þóroddur Hjaltalín Jr. 7