Tala fórnarlamba hækkar enn

Fórnarlömbum hamfaranna í Kasmír fjölgar með hverjum deginum sem líður. Nú er talið að 80 þúsund manns hafi látið lífið í jarðskjálftanum. Aðstæður eftirlifenda eru svo hrikalegar að tugþúsundir manna eru í hættu verði ekki gripið til róttækra björgunaraðgerða. Opinberar upplýsingar frá pakistönskum yfirvöldum segja fórnarlömbin nú fjörutíu og sjö þúsund sjöhundruð tuttugu og þrjú, en hjálparstarfsmenn og aðrir á vettvangi segja nær lagi að gera ráð fyrir áttatíu þúsund fórnarlömbum og að þeim fjölgi um á milli tvö og þrjú þúsund daglega. Það eru ekki nægilega margar þyrlur á svæðinu til að ferja nauðþurftir til þeirra sem þurfa hjálp og talsmenn NATO segjast til að mynda ekki getað útvegað fleiri þyrlur. Indverski herinn hefur boðið þyrlur, en Pakistanar vilja ekki að indverskir herflugmenn fljúgi þeim. Það vantar húsaskjól en vetrartjöldin sem þörf er á eru hvergi til. Jafnvel þó svo væri, væri ekki hægt að koma þeim til skila. Múlasnar eru notaðir til að ferja hjálpargögn í fjallabyggðir. Og þar sem hægt er að hjálpa gerist það hægt: Peter Holmstroem, sænskur hjálparliði sem sér um að byggingu búðanna segir þá hafa búðir sem geti séð um 70 manns. En það eru hins vegar hundruð þúsunda sem hafa ekkert skjól og þarf að búa til neyðarskýli af þessari gerð fyrir. Í dag riðu svo yfir eftirskjálftar, þeir öflugustu síðan stóru skjálftarnir gengu yfir fyrir tæpum hálfum mánuði. Skriður féllu í kjölfarið á vegi sem nýlokið var að ryðja. Vetur færist nær í Kasmír, hitastigið lækkar með hverjum deginum og um leið eykst örvænting fólksins sem ekki er víst að lifi af.