Newcastle úr fallsæti

Newcastle gerði góða ferð á White Hart Lane þar sem liðið lagði heimamenn í Tottenham 2-1 í ensku úrvalsdeildinni í fótbolta í dag.

Tottenham var 1-0 yfir í hálfleik með marki frá Emmanuel Adebayor á 18. mínútu en það tók Sammy Ameobi aðeins örfárar sekúndur að jafna metin í upphafi seinni hálfleiks en hann kom inn á sem varamaður í hálfleik.

Tottenham var mikið betri aðilinn í fyrri hálfleik en Newcastle sýndi hvað í liðinu býr í seinni hálfleik og kom Spánverjinn Ayoze Pérez liðinu yfir á 58. mínútu og reyndist það sigurmarkið í leiknum.

Newcastle lyfti sér úr fallsæti með sigrinum en liðið er nú með 10 stig rétt fyrir neðan miðja deild eftir 9 leiki. Tottenham er með stigi meira í 11. sæti deildarinnar.