Lá meðvitundarlaus í blóði sínu

Maður fannst meðvitundarlaus við húsgagnaverslun í Bæjarlind í Kópavogi um klukkan níu í morgun. Lögreglunni á höfuðborgarsvæðinu barst tilkynning um mann sem lægi meðvitundarlaus í blóði sínu fyrir utan húsið. Maðurinn var með alvarlega áverka á höfði.

Maðurinn er 46 ára gamall. Hann var með bæði síma og veski á sér og því bendir ekkert til þess að hann hafi verið rændur. Hann var fluttur á slysadeild og er enn ekki kominn til meðvitundar en að sögn lögreglu er líðan hans stöðug.

Ekki er vitað hvort maðurinn datt á höfuðið eða hvort um líkamsárás hafi verið að ræða. Málið er í rannsókn og þiggur lögregla ábendingar í síma 444-1000.