Rio og Capello hafa samið frið

Fabio Capello, landsliðsþjálfari Englands, og varnarmaðurinn Rio Ferdinand hafa samið frið en afar kalt hefur verið á milli þeirra síðan Capello ákvað að taka fyrirliðabandið af Rio.

Rio tók upphaflega við fyrirliðabandinu af John Terry þegar sá síðarnefndi lenti í vandræðum í einkalífinu. Sá stormur er nú genginn yfir og Terry aftur orðinn fyrirliði.

Rio var afar fúll er hann missti fyrirliðastöðuna og sakaði Capello um að sýna sér vanvirðingu. Capello hefur viðurkennt mistök í því hvernig hann tók á málinu en nú er búið að hreinsa loftið.

"Við höfum tekist í hendur og samband okkar er frábært í dag," sagði Capello á blaðamannafundi. "Ég sagði honum raunverulegu söguna í málinu og við hreinsuðum loftið. Það var mjög gott."

Terry segir að allt sé í himnalagi á milli sín og Rio og því lítið til fyrirstöðu að þeir byrji að spila saman á ný í hjarta ensku varnarinnar.