McClaren sat einn í varamannaskýlinu í hálfleik

Steve McClaren, stjóri Nottingham Forest, var vægast sagt ósáttur við sína menn sem töpuðu 5-1 fyrir Burnley í ensku B-deildinni í kvöld.

Burnley komst í 4-0 forystu í fyrri hálfleik og var McClaren svo reiður sínum leikmönnum í leikhlénu að hann sendi þá út á völlinn aftur þar sem þeir hituðu upp í tíu mínútur. McClaren sjálfur sat á meðan einn í varamannaskýli Forest.

„Það eru á endanum leikmennirnir sjálfir sem ganga yfir hvítu línuna og bera ábyrgð á sinni frammistöðu. Þannig að já, ég sendi þá snemma út á völlinn fyrir seinni hálfleikinn,“ sagði McClaren eftir leikinn.

Forest er aðeins með átta stig eftir fyrstu níu leiki sína á tímabilinu og situr í 20. sæti. Óvíst er hvort að McClaren haldi starfi sínu mikið lengur.

„Það eru aðrir sem ákveða mína framtíð hjá félaginu. En þetta snýst ekki um mig eða mitt starf - heldur liðið.“