Þeir sem stunda meira kynlíf fá hærri laun

Fólk sem stundar kynlíf oftar en fjórum sinnum í viku fær hærri laun en samstarfsfólk þeirra sem er minna kynferðislega virkt. Þetta kemur fram í rannsókn Nick Drydakis, sem gerir rannsóknir fyrir stofnun sem að sérhæfir sig í vinnumarkaðsrannsóknum.

Drydakis greindi spurningalista sem lagðir voru fyrir 7500 grískar fjölskyldur. Þátttakendur í rannsókninni voru spurðir meðal annars hversu oft í viku þeir stunduðu kynlíf, hvort þeir væru með atvinnu, hversu há laun þeir fengju og hversu marga tíma á viku þeir ynnu.

Niðurstöður rannsóknarinnar leiddu ekki í ljós að það að stunda meira kynlíf beinlínis leiði til launahækkunar heldur sýndi fram á tengsl tveggja atriða. Annars vegar það að fólk sem stundar oftar kynlíf hefur tilhneigingu til að vera hamingjusamara, hafa meira sjálfstraust, vera rökvísara og er ólíklegra til þess að eiga við þunglyndi að stríða. Hins vegar þá staðreynd að starfsmenn sem eiga við heilsuvandamál að stríða virðast hafa minni tekjur vegna minni afkastagetu og í sumum tilfellum, mismununar. Af þessu leiðir að kynlíf gerir manneskju hamingjusamari og heilbrigðari og þeir eiginleikar leiða til hærri launa.

Hvað sem öðru líður þá er það staðhæft í rannsókninni að raunveruleg tengsl séu á milli kynlífs og hærri launa og margvíslegar tilgátur eru settar fram auk þeirrar hér að ofan. Til að mynda sú að fólk sem að hefur hærri laun sé eftirsóknarverðara á stefnumótamarkaðnum og stundi því meira kynlíf. En engin gögn eru enn til sem styðja þá tilgátu.