Bandarískt njósnaskip til sýnis

Bandarískt herskip, sem Norður-Kóreumenn lögðu hald á seint á sjöunda áratugnum, hefur verið málað og er nú til sýnis við höfnina í Pjongjang, höfuðborg Norður-Kóreu.

Þetta er gert í tilefni þess að sextíu ár eru nú frá lokum Kóreustríðsins. Skipið var notað til njósna og þykir hertaka þess eitt helsta hernaðarafrek Norður-Kóreu á tímum kalda stríðsins.

Norður-Kóreumenn hafa gert mikið úr þessu afmæli og vígðu í gær nýjan kirkjugarð í Pjongjang, sem verður eins konar minnismerki um stríðið. Þangað verða fluttar jarðneskar leifar hermanna sem féllu í Kóreustríðinu – en aðeins þó þeirra sem þóttu standa sig sérlega hetjulega.