Fuglaflensa í Tyrklandi

Fuglaflensan mannskæða er nú komin að landamærum Evrópu. Talsmenn framkvæmdastjórnar Evrópusambandsins tilkynntu í morgun að rannsóknir úr sýnum, sem tekin voru úr fuglum í Tyrklandi, hefðu leitt í ljós afbrigði veirunnar sem væri hættulegt mönnum. Um er að ræða fuglaflensu-afbrigðið, H5N1, sem þegar hefur valdið miklum usla í Asíu og kostað um sextíu manns lífið. Þessar niðurstöður þyka mikið áfall fyrir Tyrki, sem hafa nýhafið aðildarviðræður við Evrópusambandið. Innflutningur á fuglakjöti og öðrum fuglaafurðum frá landinu var bannaður um leið og grunur lék á að veiran hefði greinst þar, en nú þegar staðfestar niðurstöður sérfræðinga liggja fyrir þarf væntanlega að grípa til enn víðtækari aðgerða. Sérfræðingar ESB gera ráð fyrir að niðurstöður úr sýnum í Rúmeníu liggi fyrir í dag eða á morgun. Þeir ganga út frá því að um sama stofn sé að ræða þar og í Tyrklandi - það er að um sé að ræða fuglaflensuna mannskæðu. Markos Kyprianou, yfirmaður heilbrigðis- og neytendaverndar ESB, segir að sérfræðingar sambandsins áformi að halda neyðarfund um málið á morgun. Hann segir líklegt að fólk, sem sé á ferðalagi um Tyrkland og Rúmeníu, og önnur lönd þar sem veiran hefur greinst, verði hvatt til að gera varúðarráðstafanir.