Innlent

Fjármálaráðherra spyr hvar fólk hafi verið

Heimir Már Pétursson skrifar
Fjármálaráðherra spyr hvar þeir hafi verið sem ekki sjái þær breytingar á stöðu efnahagsmála sem átt hafi sér stað vegna kórónuveirufaraldursins.
Fjármálaráðherra spyr hvar þeir hafi verið sem ekki sjái þær breytingar á stöðu efnahagsmála sem átt hafi sér stað vegna kórónuveirufaraldursins. Vísir/Vilhelm

Fjármálaráðherra segir að þeir sem sjái ekki þær breytingar sem orðið hafi í efnahagsmálum vegna kórónuveirunnar séu ekki raunveruleikatengdir. Varnarbarátta fyrir lífskjarasamningunum standi tæpt og ekki svigrúm til að semja um meira.

Í óundirbúnum fyrirspurnum á Alþingi í morgun vísaði Halldóra Mogensen þingmaður Pírata til þess að Bjarni Benediktsson fjármálaráðherra hefði sagt í fjölmiðlum að forsendur lífskjarasamninganna stæðu tæpt og augljóst að ekki væri mikið svigrúm til að mæta kröfum sem nú væru uppi í kjaradeilum.

Halldóra Mogensen segir nægt svigrúm til aðgerða fyrir fyrirtæki en þegar komi að launum fólks í grunnstoðum samfélagsins sé svigrúmið ekkert.Vísir/Vilhelm

„Það virðist vera gríðarlegt svigrúm til að koma til móts við kröfur stærstu fyrirtækja í landinu. Að greiða hlutabætur og uppsagnarfrest fyrir starfsfólkið svo fyrirtækin þurfi ekki að bera kostnaðinn af því. En þegar kemur að svigrúmi til að greiða fólki sem sinnir ómissandi grunnþjónustu í landinu sanngjörn laun þá er svigrúmið allt í einu ekki neitt,” sagði Halldóra.

„Ég spyr nú háttvirtan þingmann bara; hvar hefur þú verið. Átta menn sig ekki á því sem er að gerast á Íslandi? Við erum að tapa á þessu ári, umfram það sem við héldum að yrði halli ársins, tvö hundruð og fimmtíu milljörðum eða eitthvað slíkt,” sagði Bjarni.

Sem væri tvöföld sú fjárhæð sem stjórnvöld hafi ætlað að setja í höfuðborgarpakkann til ársins 2033 sem mörgum hafi þótt nóg um.

„Ég veit ekki hvað ég get gert fólki til hjálpar sem skilur ekki hvað hefur breyst,” sagði fjármálaráðherra.

Ríkisstjórnin sé ekki beinn aðili að lífskjarasamningunum. Þeir hafi verið gerðir með stuðningi stjórnvalda á forsendum sem þá voru. Nú séu hins vegar uppi kröfur um meira en þeir samningar gáfu. Hann hafi sagt að þrátt fyrir að þær forsendur hafi breyst í grundvallaratriðum, hafi enn fram á þennan dag verið gerðir samningar sem taki mið af þeim.

Fjármálaráðherra efast um raunveruleikaskyn þeirra sem ekki sjá að varnarbarátta fyrir lífskjarasamningunum stendur tæpt og ekki hægt að semja um meira.Vísir/Vilhelm

„Þeir sem ekki sjá að það er ekki svigrúm til að ganga lengra en lífskjarasamningarnir í nýjum kjarasamningum eru einfaldlega ekki raunveruleikatengdir. Við erum í varnarbaráttu. Við erum að reyna að verja það sem gert var í lífskjarasamningunum og það stendur tæpt,” sagði Bjarni

„Ég átta mig alveg á ástandinu. Þetta snýst bara um forgangsröðun,” og hugmyndafræði sagði Halldóra. Það ætti greinilega ekki að setja í forgang að greiða mannsæmandi laun til stétta sem reynslan sýni að samfélagið hrynji án.

„Hvernig stendur á því að svigrúmir er endalaust þegar kemur að björgunaraðgerðum fyrir fyrirtæki í þeirri varnarbaráttu. En þegar kemur að varnarbaráttu fyrir grunnstoðir samfélagsins. Fyrir fólk sem vinnur ómissandi grunnþjónustu í samfélaginu . Þá er svigrúmið ekki neitt. Þetta elur á óánægju, streitu, veikindum að meta fólk ekki af verðleikum. Þetta grefur undan grunnstoðum samfélagsins og ég spyr hæstvirtan fjármálaráðherra; hvað kostar það,” sagði Halldóra Mogensen.


Tengdar fréttir

„Við ætlum ekki að gefa neitt eftir“

Skólahald lá niðri eða var skert í nokkrum leik- og grunnskólum í Kópavogi í dag vegna verkfalls Eflingar. Ekki var fundað í deilunni í dag og enginn fundur hefur verið boðaður.

Efling segir SÍS neita að semja

Efling stéttarfélag og Samband íslenskra sveitarfélaga hafa enn ekki náð saman í samningaviðræðum sínum. Í fréttatilkynningu Eflingar segir að SÍS neiti að gera kjarasamning sambærilegan þeim sem Ríkið, Reykjavíkurborg og Faxaflóahafnir hafi þegar gert við félagið.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.