Nýja brúin fær vegtengingu á næsta ári

Vegagerðin hefur boðið út lagningu vega að nýrri brú yfir Reykjadalsá í Reykholtsdal í Borgarfirði og samkvæmt útboðsauglýsingu eiga þeir að vera tilbúnir 15. júlí næsta sumar. Nýja brúin, sem lokið var við í vor, mun því standa ónotuð án vegtengingar í heilt ár áður en vegfarendur fá að aka yfir hana.

Tilboð í gerð 2,2 kílómetra kafla við Reykjadalsá, milli Reykholts og Kleppjárnsreykja, voru opnuð hjá Vegagerðinni í fyrradag. Borgarverk í Borgarnesi átti lægsta boð, upp á 53,4 milljónir króna. Það er um 73 prósent af kostnaðaráætlun, sem hljóðaði upp á 72,9 milljónir króna.

Sjö tilboð bárust í verkið og voru öll nema eitt undir kostnaðaráætlun. Næstlægsta boð, frá Þrótti á Akranesi, var upp á 56,3 milljónir, eða 77 prósent af kostnaðaráætlun.

Vegagerðin fól eigin vinnuflokki brúarsmíðina þar sem hann var verkefnalaus. Hófst hann handa í febrúar og lauk smíðinni í júní. Engin fjárveiting var hins vegar til fyrir vegagerð að brúnni og því stendur hún ónotuð í miðjum Reykholtsdal.

Vegfarendur þurfa því enn um sinn að notast við gömlu brúna, sem var byggð árið 1939. Hún er orðin svo léleg að þyngstu ökutæki mega ekki aka yfir hana og er annar landstöpull hennar brotinn. Vegagerðin áætlar að nýjan brúin ásamt nýjum vegum kosti um 300 milljónir króna.