Nýja brúin stendur ónotuð - veginn vantar

Þorpin tvö í Reykholtsdal í Borgarfirði, Kleppjárnsreykir og Reykholt, fá betri tengingu með nýrri brú yfir Reykjadalsá, sem er að verða tilbúin. Brúin verður þó ekki opnuð fyrr en eftir rúmt ár þar sem fjárveitingu vantar í vegagerð að henni.

Gamla brúin er mjó og einbreið en verður leyst af hólmi með nýrri brú sem risin er um eitthundrað metrum austar. Gamla brúin er komin á áttræðisaldur, byggð 1939, og orðin svo léleg að þyngstu ökutæki mega ekki aka yfir hana. Vegafarendur milli Reykholts og Kleppjárnsreykja losna við ein gatnamót en fá líka örlítla styttingu vegarins milli þorpanna.

Vegagerðin áætlar að nýjan brúin ásamt nýjum vegum kosti um 300 milljónir króna. Sigurður Hallur Sigurðsson, brúarsmiður hjá Vegagerðinni, segir að þetta verði allt annað. Nýja brúin sé í fullri breidd en gamla brúin bæði mjög og léleg og landstöpullinn öðru megin brotinn.

„Þanng að þetta skipti miklu máli fyrir byggðina að fá svona góða brú," segir Sigurður Hallur í viðtali í fréttum Stöðvar 2.

Brúarsmiðirnir eru flestir Húnvetningar úr vinnuflokki Vegagerðarinnar á Hvammstanga. Þeir hófust handa 16. febrúar í vetur og hefur allt gengið að óskum, að sögn Sigurðar. Þeir hafi þó lent í miklu vatni fyrst og töfum vegna vatnavaxta en þá var Reykjadalsá ekki jafn sakleysisleg og hún hefur verið í sumar.

Þótt brúin sé nánast tilbúin fæst fjárveiting til að ljúka vegagerð að henni ekki fyrr en á næsta ári, samkvæmt upplýsingum Vegagerðarinnar. Vinnuflokkinn vantaði verkefni og var ákveðið að nýta hann í brúarsmíðina, þótt vegurinn kæmi síðar, en áætlað er að hann verði tilbúinn síðla næsta sumars. Nýja brúin mun því standa þarna ónotuð í rúmt ár.