Delap á í vandræðum með öxlina

Rory Delap, leikmaður enska úrvalsdeildarfélagsins Stoke, segist eiga í vandræðum vegna axlarmeiðsla en hann er þekktur fyrir löng innköst sín.

Delap er sprautaður með verkjalyfjum bæði fyrir leik og í hálfleik svo hann geti tekið innköstin sem oft hafa skapað usla í vörn andstæðingsins, líkt og hjá Aroni Einari Gunnarssyni, leikmanni Coventry sem leikur í ensku B-deildinni.

„Ég datt á öxlina fyrr á tímabilinu og ég hélt að meiðslin væru búin að jafna sig. En svo datt ég aftur og meiðslin tóku sig upp. Eina ástæðan fyrir því að ég hef getað spilað er vegna sprautumeðferðarinnar."

Delap sagði að sprautumeðferðin sem hann hefur fengið á leikdögum dugi aðeins til að deyfa verkina á meðan leiknum stendur. Hann hefur nú hins vegar gengist undir stífari meðferð til þess að reyna að vinna bug á meininu.