Inter fékk á sig jöfnunarmark í uppbótartíma

Inter gerði 1-1 jafntefli við Fiorentina í Flórens í lokaleik dagsins í ítölsku úrvalsdeildinni.

Dusan Vlahovic, 19 ára Serbi, skoraði jöfnunarmark Fiorentina þegar tvær mínútur voru komnar fram yfir venjulegan leiktíma. Hann setti boltann þá með vinstri fæti í fjærhornið eftir góðan sprett.

Inter náði forystunni strax á 8. mínútu þegar spænski miðjumaðurinn Borja Valero skoraði með lúmsku skoti.

Gestunum frá Mílanó tókst ekki að bæta við mörkum og þeim var refsað undir lokin.

Þetta er annað jafntefli Inter í röð. Það dugði liðinu þó til að endurheimta toppsætið. Inter er með 39 stig, jafn mörg og Juventus.

Fiorentina er í 13. sæti deildarinnar með 17 stig. Liðið hefur ekki unnið deildarleik síðan 30. október.