Alfreð spilar ekki meira á þessu ári
Íslenski landsliðsframherjinn Alfreð Finnbogason spilar ekki meira á þessu ári í kjölfar meiðsla sem hann hlaut í landsleik Íslands og Tyrklands í undankeppni EM 2020 í Istanbul á dögunum.
Alfreð spilar með Augsburg í þýsku Bundesligunni en þar í landi er tekið vetrarfrí og hefur félagið staðfest að Alfreð muni ekki snúa aftur fyrr en að því loknu en fyrsti deildarleikur Augsburg á nýju ári verður þann 18.janúar.
„Ég hef verið óheppinn með meiðsli á undanförnum árum en ég hef verið í toppformi að undanförnu og mun ekki láta þessi meiðsli slá mig út af laginu,“ er haft eftir Alfreð á heimasíðu Augsburg.
Alfreð hefur skorað tvö mörk í níu leikjum í þýsku Bundesligunni í vetur en þetta er hans fimmta tímabil hjá félaginu.
Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.
