Síðasti séns að senda inn umsögn um samgönguáætlun í dag

Frestur til að senda inn umsögn í samráðsgátt um uppfærða og endurskoðaða samgönguáætlun næstu fimmtán ára rennur út í dag. Þegar þetta er skrifað hafa borist ríflega 50 umsagnir í gáttina frá bæði einstaklingum, sveitarfélögum og öðrum hagsmunaaðilum. Í umsögnum sveitarfélaganna er víða kallað eftir því að sveitarfélögin verði höfð með í ráðum þegar kemur að innheimtu veggjalda og að slíkum gjöldum verði stillt í hóf þar sem til greina kemur að hefja gjaldtöku.

Sigurður Ingi Jóhannsson, samgöngu- og sveitarstjórnarráðherra, kynnti uppfærða og endurskoðaða samgönguáætlun til ársins 2034 á opnum fundi þann 17. október síðastliðinn og sama dag fór hún í samráðsgátt. Meðal þess sem boðað er í nýju áætluninni er ný flugstefna fyrir Ísland, sérstök jarðgangaáætlun og þá er stefnt að því að flýta fjölda verkefna frá því sem boðað var í samgönguáætlun sem samþykkt var í febrúar. Stefnt er einnig að því að sérstök gjaldtaka verði tekin af vegfarendum í tengslum við sex fyrirhuguð verkefni.

Sjá einnig: Horfa til Færeyja við fjármögnun jarðganga

Í umsögn Bláskógarbyggðar fagnar sveitarstjórn því að gert sé ráð fyrir fjármagni til að ljúka framkvæmdum við Reykjaveg og Skeiða- og Hrunamannaveg árið 2020. Sveitarfélagið bendir þó á í umsögn sinni að rík þörf sé á að fækka einbreiðum brúm á umferðarmiklum stofnvegum. „Loks vill sveitarstjórn minna á að nauðsynlegt er að sveitarfélögin hafi aðkomu að ákvarðanatöku um hugsanleg veggjöld og útfærslu þeirra.

Ísafjarðarbær fagnar áformum um að setja eigi aukið fjármagn í vegaframkvæmdir um landið. „Á sama tíma telur bæjarráð vegskála milli Súðavíkur og Ísafjarðar til marks um skammsýni þar sem eina leiðin til að tryggja öryggi vegfarenda á svæðinu séu jarðgöng,“ segir meðal annars i umsögn Ísafjarðarbæjar. Þá kallar sveitarfélagið einnig eftir nánari útlistun á áætlun um veggjöld í jarðgöngum. Bæjarráð telji ekki boðlegt að íbúar þurfi að greiða veggjöld í jarðgöngum þar sem aðeins er ein leið í boði. Vesturbyggð fagnar jafnframt áformum um vegaframkvæmdir á Dynjandisheiði en gerir margvíslegar aðrar athugasemdir.

Meðal annarra sveitarfélaga sem gera athugasemdir við áform um veggjöld eru sveitarfélagið Hornafjörður sem ítrekar að þeim verði að halda í algjöru lágmarki. Fljótsdalshérað tekur í svipaðan streng

Grunnskólabörn „veljast um á vondum vegi“

Þá gera Samtök sveitarfélaga á Norðurlandi vestra margvíslegar athugasemdir í sinni umsögn. Þar er meðal annars lögð áhersla á að Alexandersflugvöllur á Sauðárkróki verði skilgreindur í grunnneti flugvalla á nýjan leik, þess krafist að framkvæmdum við Skagastrandarvegi hefjist á næsta ári og kallað er eftir stórauknu fjármagni til uppbyggingar og viðhalds á tengivegum. Þá vill stjórn samtakanna að ráðist verði í rannsóknir og mat á hagkvæmni við gerð jarðganga á Tröllaskaga og úr Fljótum í Hólsdal.

Í umsögn Húnaþings vestra fagnar byggðaráð því að framkvæmdir við Vatnsnesveg sé að finna í áætluninni. Það veldur ráðinu aftur á móti vonbrigðum að framkvæmdir við veginn séu ekki fyrirhugaðar fyrr en á þriðja tímabili áætlunarinnar á árunum 2029 til 2034. „Grunnskólabörn sem búa við veg 771 þurfa að fara í skólabíl um veginn tvisvar á dag, hvern virkan dag, níu mánuði ársins, í tíu ár. Þannig velkjast börnin á vondum vegi, á lágmarkshraða, með tilheyrandi óþægindum,“ segir meðal annars í umsögninni. Þá hafi umferð um veginn aukist sem hafi í för með sér aukna slysatíðni. Þess má einnig geta að fjöldi einstaklinga hefur sent inn umsögn um þennan sama veg.