Erlent

Vissu að Trump hefði stöðvað aðstoð á meðan þrýstingur stóð yfir

Kjartan Kjartansson skrifar
Zelenskíj Úkraínuforset (fremri til vinstri) hefur ekki verið skýr um hvenær hann vissi fyrst að Trump hefði stöðvað hernaðaraðstoð í sumar.
Zelenskíj Úkraínuforset (fremri til vinstri) hefur ekki verið skýr um hvenær hann vissi fyrst að Trump hefði stöðvað hernaðaraðstoð í sumar. Vísir/EPA

Stjórnvöld í Kænugarði vissu þegar í byrjun ágúst að Donald Trump Bandaríkjaforseti hefði stöðvað hundruð milljóna dollara hernaðaraðstoð til þeirra. Trump og bandamenn hans hafa ítrekað haldið því fram að ekkert vafasamt hafi átt sér stað í tengslum við veitingu aðstoðarinnar vegna þess að Úkraínumenn hafi ekki vitað af því að hún hefði verið stöðvuð tímabundið.

Eitt af lykilatriðunum í rannsókn fulltrúadeildar Bandaríkjaþings á mögulegum embættisbrotum Trump forseta í samskiptum hans við úkraínsk stjórnvöld er hvort að hann hafi haldið eftir tæplega 400 milljóna dollara hernaðaraðstoð í júlí til að þrýsta á þau að rannsaka pólitískan andstæðing hans.

Rannsóknin hófst eftir að uppljóstrari innan leyniþjónustunnar lagði fram formlega kvörtun vegna símtals Trump við Volodímír Zelenskíj, forseta Úkraínu, 25. júlí þar sem Trump lagði fast að úkraínska forsetanum að rannsaka Joe Biden, fyrrverandi varaforseta og mögulegan mótframbjóðanda Trump í forsetakosningum næsta árs. Taldi uppljóstrarinn að Trump hefði þannig misbeitt valdi sínu vegna persónulegra pólitískra hagsmuna hans.

Trump og bandamenn hans hafa ítrekað hafnað því að hernaðaraðstoðin, sem hann lét stöðva skömmu fyrir símtali við Zelenskíj, hafi verið hluti af einhvers konar „kaupi kaups“ þar sem Úkraínumenn samþykktu í staðinn að rannsaka Biden og stoðlausa samsæriskenningu um forsetakosningarnar í Bandaríkjunum árið 2016.

New York Times segir nú að úkraínsk stjórnvöld hafi þvert á móti vitað þegar í byrjun ágúst að hernaðaraðstoðin hefði verið stöðvuð og byggir frétt sína á viðtölum og gögnum. Þeim hafi verið sagt að tala við Mick Mulvaney, starfandi starfsmannastjóra Hvíta hússins, til að greiða úr málunum.

Trump krafðist þess meðal annars að Úkraínumenn rannsökuðu samsæriskenningu um að tölvupóstþjónn Demókrataflokksins sem brotist var inn í sé bókstaflega falinn í Úkraínu. Sú kenning á sér enga stoð í raunveruleikanum. Vísir/EPA

Embættismaður Pentagon ræddi við úkraínskan embættismann

Fram að þessu hafa bandarískir og úkraínskir embættismenn haldið því fram að þeir úkraínsku hafi ekki vitað af því að hernaðaraðstoðin hefði verið stöðvuð þar til það kom fram í fréttum undir lok ágúst. Aðstoðin var greidd út 11. september eftir að bandarískir þingmenn hófu að grennslast fyrir um tafirnar.

Samkvæmt heimildum New York Times vissu úkraínsk stjórnvöld því af því að hernaðaraðstoðin hefði verið sett á ís stærstan hluta ágústmánaðar þegar Rudy Giuliani, persónulegur lögmaður Trump, og tveir bandarískir embættismenn þrýstu á ríkisstjórn Zelenskíj að lýsa því opinberlega yfir að rannsókn væri hafin á Biden og demókrötum.

Blaðið segir bandarískan embættismann hjá varnarmálaráðuneytinu hafa rætt stöðvun aðstoðarinnar við úkraínskan embættismann snemma í ágúst. Hvatti hann Úkraínumenn til að hafa samband við Mulvaney vegna þess.

Þetta er í samræmi við það sem kom fram í kvörtun uppljóstrarans innan leyniþjónustunnar sem sagðist hafa heyrt frá bandarískum embættismönnum að einhverjir úkraínskir embættismenn óttuðust að hernaðaraðstoðin væri í uppnámi.

Zelenskíj hefur ekki verið skýr um hvenær hann frétti af töfunum á hernaðaraðstoðinni. Hann hefur neitað því að aðstoðin hafi verið notuð til að kúga hann til að verða við kröfu Trump en einnig viðurkennt að hafa vitað af því að hún hefði verið stöðvuð áður en hann fundaði með Mike Pence, varaforseta í Varsjá 1. september.

William Taylor bar vitni á bak við luktar dyr í gær. Utanríkisráðuneytið lagðist gegn því að hann bæri vitni en hann gerði það engu að síður eftir að þingnefndin gaf út stefnu á hendur honum. AP/Andrew Harnik

Tengdi Trump beint við þrýstingsherferð um pólitískan greiða

Nokkrir núverandi og fyrrverandi embættismenn utanríkisþjónustu Bandaríkjanna og Hvíta hússins hafa borið vitni í rannsókn fulltrúadeildarinnar síðustu vikur. Þeir hafa lýst því hvernig Trump fólk Giuliani í reynd að stýra skuggautanríkisstefnu gagnvart Úkraínu sem virðist hafa verið miðuð að því að tryggja pólitíska hagsmuni Trump sjálfs frekar en sameiginlega öryggishagsmuni Úkraínu og Bandaríkjanna.

Stjórnvöld í Kænugarði hafa um margt verið háð Bandaríkjastjórn um stuðning í baráttu þeirra gegn uppreisnarmönnum sem eru hliðhollir Rússum í austanverðri Úkraínu eftir að Rússar innlimuðu Krímskaga árið 2014. Hernaðaraðstoðin sem Trump stöðvaði var hluti af stuðningi Bandaríkjanna vegna þess.

William Taylor, hæst setti erindreki Bandaríkjanna í Úkraínu, er sagður hafa greint þingnefnd sem rannsakar möguleg embættisbrot Trump frá því að forsetinn hafi stöðvað hernaðaraðstoðin og neitað að veita Zelenskíj fund sem úkraínski forsetinn sóttist eftir nema hann féllist á að rannsaka pólitíska andstæðinga Trump.

Í skriflegri yfirlýsingu sem Taylor lagði fyrir nefndina sagði hann að Gordon Sondland, sendiherra Bandaríkjanna gagnvart Evrópusambandinu sem Trump fól að vera tengiliður sinn gagnvart Úkraínu, hefði skýrt stöðuna með því að líkja Trump við viðskiptamann.

„Þegar viðskiptamaður ætlar að skrifa undir ávísun til einhvers sem skuldar honum eitthvað biður viðskiptamaðurinn hann um að borga áður en hann skrifar undir,“ sagði Sondland við Taylor.

Taylor sagði þá líkingu óskiljanlega þar sem Úkraínumenn skulduðu Trump forseta ekkert. Í smáskilaboðum sem annar bandarísku erindreki, Kurt Volker, afhenti þingnefndinni kom fram að Taylor hefði sagt það „sturlað“ að tengja öryggisaðstoð til Úkraínu við aðstoð við stjórnmálaframboð Trump.

Eftir að fjölmiðlar greindu frá efni framburðar Taylor og annarra embættismanna sendi Hvíta húsið frá sér yfirlýsingu þar sem það úthrópaði núverandi og fyrrverandi starfsmenn alríkisstjórnarinnar sem undir það heyrir sem „róttæka ókjörna skriffinna“.


Tengdar fréttir

Háttsettur erindreki segir Trump hafa tengt aðstoð við Úkraínu við rannsókn á pólitískum andstæðingum

William B. Taylor, starfandi sendiherra Bandaríkjanna í Úkraínu, greindi rannsakendum sem rannsaka möguleg embættisbrot Donald Trump forseta Bandaríkjanna, frá því í dag að Trump hafi neitað að veita Úkraínu hernaðaraðstoð og að hann hafnað því að funda með forseta Úkraínu í Hvíta húsinu nema hann myndi heita því að rannsaka andstæðinga Trump í bandarískum stjórnmálum.

Segir Trump hafa haldið aftur af hernaðaraðstoð til þess að fá Demókrata rannsakaða

Ríkisstjórn Bandaríkjanna undir stjórn forsetans Donald Trump, hélt aftur af tæplega 400 milljón dala hernaðaraðstoð til þess að þrýsta á úkraínsk yfirvöld til þess að rannsaka meinta aðstoð sem yfirvöld í Kænugarði veittu Demókrataflokknum í aðdraganda forsetakosninganna árið 2016, frá þessu greindi starfandi starfsmannastjóri Hvíta hússins, Mick Mulvaney í blaðamannafundi.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.