Víðáttumikil lægð er nú stödd langt suður í hafi og „færir okkur austanstorm með suðurströndinni, einkum undir Eyjafjöllum og í Öræfum,“ að því er segir í hugleiðingum veðurfræðings á vef Veðurstofu Íslands. Vindurinn nær sér á strik í kringum hádegi en gular viðvaranir á Suður- og Suðausturlandi verða í gildi frá því um hádegisbil og til miðnættis.



„Annars staðar á landinu er útlit fyrir stífa austanátt þó að náist líklega ekki í stormstyrk nema á hálendinu. Með þessum stífa vindi er rigning um landið S- og A-vert og jafnvel talsverð um tíma SA-lands í kvöld,“ segir í hugleiðingum veðurfræðings.



Á morgun dregur svo úr vindi víðast hvar. Líklega verður þó áfram stormur í Öræfum fram eftir degi og einhver væta um landið austanvert.

Veðurhorfur á landinu næstu daga

Á miðvikudag:

Austan 8-13 m/s, en 13-20 SA-lands. Þurrt að kalla á landinu, en rigning með köflum A-ast. Hiti 4 til 11 stig, mildast SV-til.



Á fimmtudag:

Norðaustan 8-15 m/s. Rigning SA- og A-lands, skýjað en úrkomulítið norðantil, en léttskýjað um landið V-vert. Hiti 2 til 8 stig, mildast syðst.



Á föstudag:

Hægt minnkandi norðaustanátt. Skýjað og úrkomulítið fyrir austan, en bjart með köflum V-lands. Hiti 1 til 6 stig yfir daginn, en víða líkur á næturfrosti.



Á laugardag:

Fremur hæg breytileg átt og skýjað með A-ströndinni, annars bjart á köflum. Kólnar heldur.



Á sunnudag:

Suðvestlæg átt og fer að rigna V-lands. Hiti 0 til 7 stig.



Á mánudag:

Útlit fyrir breytilega átt og úrkomusamt veður um allt land. Hlýnar allra syðst.