Pogba: Fólk notar útlitið til þess að dæma mig

Paul Pogba segir að hann sé dæmdur harðar en aðrir og gagnrýnendur noti hárgreiðslur hans og líkamstjáningu til þess að setja út á hann.

Pogba var í ítarlegu viðtali við breska blaðið The Times þar sem hann talaði meðal annars um kynþáttaníð, trú sína, heimsmeistaratitilinn og föðurhlutverkið.

Tímabilið var erfitt hjá Manchester United sem endaði í sjötta sæti og skipti um knattspyrnustjóra á miðju tímabili. Pogba var þó eini leikmaðurinn sem ekki kom úr annað hvort Liverpool eða Manchester City sem var valinn í úrvalslið ársins í ensku deildinni.

Hann segist bæta sig með hverju árinu en þeir sem gagnrýna hann einbeita sér á að setja út á útlit hans.

„Ég hef alltaf spilað svona og guði sé lof að ég vann HM svona,“ sagði Pogba. „Líkamstjáning, hárgreiðslur, þetta eru allt bara hlutir sem ég tjái mig með.“

„Síðan ég var krakki hef ég alltaf spilað svona. Það er ekkert vandamál þegar við vinnum en þegar við töpum, eða ég á ekki góðan leik, þá er það vandamál.“

Pogba, sem skoraði 13 mörk í 35 leikjum í ensku úrvalsdeildinni á nýliðnu tímabili, segir verðmiðann sem var á honum þegar hann kom til United hafa breytt því hvernig fólk horfði á hann.

„Ég varð allt annar leikmaður út af þessum félagsskiptum,“ sagði Pogba en hann kostaði Manchester United 89 milljónir punda árið 2016 og varð á þeim tíma dýrasti leikmaður heims.

„Afþví þetta voru stærstu kaup sögunnar á þeim tíma þá ert þú dæmdur öðruvísi en aðrir. Það er búist við meiru, góður leikur verður að venjulegum leik og frábær leikur verður að góðum leik.“

Allt viðtalið má finna hér.