Enski boltinn

Aðeins níu leikmenn mikilvægari en Gylfi í ensku úrvalsdeildinni í vetur

Óskar Ófeigur Jónsson skrifar
Gylfi Þór Sigurðsson fagnar marki.
Gylfi Þór Sigurðsson fagnar marki. Vísir/Getty

Gylfi Þór Sigurðsson kom með beinum hætti að 19 af 54 mörkum Everton á leiktíðinni og komst með því inn á topp tíu listann yfir mikilvægustu leikmenn ensku úrvalsdeildarinnar á þessu tímabili.

Gylfi skoraði sjálfur þrettán mörk en fékk einnig skráðar á sig sex stoðsendingar. Hann átti reyndar stóran þátt í fleiri mörkum ekki síst með góðum fyrirgjöfum úr hornspyrnum eða aukaspyrnum sem sköpuðu mikinn usla í vörnum mótherja Everton.

Gylfi kom tölfræðilega með beinum hætti að 35,2 prósent marka Everton í ensku úrvalsdeildinni sem skilar honum upp í tíunda sætið yfir mikilvægustu leikmenn deildarinnar 2018-19.

Squawka.com tók saman tölfræðina yfir þá leikmenn sem áttu með beinum hætti þátt í hæsta hlutfalli marka í deildinni og öllum á topp tíu fylgir einnig smá umfjöllun.



Blaðamaður squawka þakkar Gylfa fyrst og fremst fyrir það að Everton liðið náði á endanum áttunda sæti ensku úrvalsdeildarinnar.

„Það tók hann eitt tímabil að komast inn í hlutina á Merseyside en stuðningsmenn Toffees eru nú farnir að sjá það besta frá þessum frá bæra leikstjóra. Hann hefur á þessu tímabili sannað það að hár verðmiði átti rétt á sér,“ var meðal annars sagt um okkar mann.

Næstur fyrir ofan Gylfa er Arsenal-framherjinn Pierre-Emerick Aubameyang sem kom að 37 prósent mörkum Arsenal liðsins með því að skora 22 mörk og gefa 5 stoðsendingar.

Það vekur athygli að enginn leikmaður toppliðanna Manchester City og Liverpool komast á þennan lista.

Efstu menn eru Eden Hazard hjá Chelsea og Jamie Vardy hjá Leicester City en Salomon Rondon hjá Newcastle er í þriðja sætinu.

Eden Hazard átti magnað tímabil og kom að 49,2 prósent marka Chelsea liðsins með því að skora 16 mörk og gefa 15 stoðsendingar. Chelsea skoraði alls 63 mörk.

Jamie Vardy kom að 43,1 prósent marka Leicester með því að skora 18 mörk og gefa 4 stoðsendingar. Vardy kom að 22 af 51 marki Leicester.

Mikilvægasti leikmaður ensku úrvalsdeildarinnar 2018-19:
(Leikmenn sem áttu þá í hæsta hlutfalli marka síns liðs)

1. Eden Hazard, Chelsea 49,2%
2. Jamie Vardy, Leicester 43,1%
3. Salomon Rondon, Newcastle 42,9%
4. Raul Jimenez, Wolves 42,6%
5. Aleksandar Mitrovic, Fulham 41,2%
6. Callum Wilson, Bournemouth 41,1%
7. Glenn Murray, Brighton 40,0%
8. Ryan Fraser, Bournemouth 37,5%
9. Pierre-Emerick Aubameyang, Arsenal 37,0%
10. Gylfi Þór Sigurðsson, Everton 35,2%



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.