Enski boltinn

Ellefu millimetrum frá því að jafna afrek Arsenal og enda 29 ára bið

Óskar Ófeigur Jónsson skrifar
John Stones bjargar á marklínu.
John Stones bjargar á marklínu. Getty/ Shaun Botterill
Liverpool var ekki aðeins rosalega nálægt titlinum heldur einnig einstöku afreki Arsenal liðsins frá 2003 til 2004.

Manchester City tryggði sér enska meistaratitilinn í gær með því að vinna sinn fjórtánda leik í röð í ensku úrvalsdeildinni. Liðið endaði einu stigi á undan Liverpool.

Frammistaða toppliðanna í titilbaráttunni var söguleg og 97 stig Liverpool hefðu dugað til sigurs á öllum tímabilum nema einu eða þegar Manchester City setti stigametið í fyrra.

Aldrei áður hafa efstu tvö liðin safnað svo mörgum stigum og aldrei áður hafa þau tapað jafnfáum leikjum.





Manchester City tapaði fjórum sinnum fleiri leikjum en Liverpool en nýtti sér erfiðan janúar hjá Jürgen Klopp og félögum. Liverpool missti þá niður forystuna og frumkvæðið aftur til City.

Liverpool taðaði aðeins 1 af 38 leikjum sínum á tímabilinu en þetta eina tap gerði útslagið. Fimm fleiri jafntefli en City voru einnig dýrkeypt sérstaklega í leikjum á móti lakari liðum.

Á endanum munaði aðeins einu stigi á liðunum en stuðningsmenn Liverpool munu örugglega tala um annað smáatriði sem skipti öllu í baráttunni á þessu tímabili.

Liverpool tapaði aðeins einum leik á öllu tímabilinu og í þeim leik skiptu ellefu millimetrar öllu máli.

Stórglæsilegt sigurmark fyrirliðans Vincent Kompany á móti Leicester City er risastór stund á leiktíðinni en kannski var samt björgun John Stones á marklínu í janúar enn stærri.





Þetta verður kannski kallaður ellefu millimetra titillinn í framtíðinni því það var það sem munaði að Liverpool skoraði annað mark í innbyrðis leikjum á móti Manchester City í janúar.

Staðan í leiknum var þá markalaus og skot Sadio Mane var á leiðinni í markið og í raun næstum því komið yfir marklínuna þegar Stones kom til bjargar.

Marklínutæknin var notuð og þar munaði aðeins ellefu millimetrum að boltinn væri kominn yfir marklínuna.







Manchester City skoraði síðan fyrsta markið í leiknum og vann á endanum 2-1 sigur. 2-2 jafntefli hefði þýtt að Liverpool menn hefðu lyft Englandsmeistarabikarnum í fyrsta sinn í 29 ár í gær.

Jafnteflið í þessum leik á Ethiad leikvanginum 3. janúar síðastliðinn hefði einnig séð til þess að Liverpool hefði jafnað einstakan árangur Arsenal frá 2003-04 tímabilinu.

Þetta lið frá Arsenal nældi sér þá í viðurnefnið „The Invincibles"  eða „Hinir ósigrandi“.





Næstum því fjórum mánuðum síðar var skot frá Sergio Aguero sem var réttum megin við línuna og tryggði liðinu 1-0 útisigur á Burnley. Þar munaði aðeins 29.51 millimetrar eða eins og BBC orðaði það tvö prósent af bandaríska leikaranum smávaxna Danny DeVito.

Stuðningsmenn Everton voru líka fljótir að átta sig á því og benda á það að Liverpool hafði í raun misst titilinn með jafntefli á Goodison Park í byrjun mars. Það var síðasti leikurinn þar sem Liverpool tapaði stigum en um leið fjórða jafnteflið í sex leikjum.

Það eru nefnilega kannski þessi jafntefli sem kostuðu liðið titilinn og met Arsenal miklu frekar en fyrrnefndir millimetrar. Það voru réttir dómarar þökk sé nýjustu tækni sem hefði getað endað á hinn veginn ef aðeins hefði verið treyst á augu dómarann.

Við vorum áratugum frá marklínutækni þegar Liverpool vann síðast Englandsmeistaratitilinn 1990 og meðal annars þökk sé þessum millimetrum þá er næst á dagskrá hjá Liverpool að fagnað 30 ára afmæli Englandsmeistaraliðs síns frá 1989-90 með því að vinna titilinn á næsta ári.

Enski boltinn

Mest lesið


Fleiri fréttir

Sjá meira


×

Mest lesið